मुंबई महानगरपालिकेमार्फत कार्यकारी सहाय्यक/लिपिक पदासाठी भरती प्रक्रिया सुरू 

एज्युवार्ता न्युज नेटवर्क 

मुंबई महानगर पालिका (BMC) कडून कार्यकारी सहाय्यक (Executive Assistant)/लिपिकच्या (Clerk Posts) 1800 हून अधिक पदांसाठी भरती प्रक्रिया (Recruitment Process) सुरू करण्यात आली आहे. इच्छुक आणि पात्र उमेदवारांनी 9 सप्टेंबरपर्यंत अर्ज करावा. ही पोस्ट 'क' गटातील आहे. BMC एक्झिक्युटिव्ह असिस्टंट (Executive Assistant) किंवा लिपिक (clerk) पदांसाठी फक्त ऑनलाइन अर्ज करता येईल. अर्ज करण्यासाठी उमेदवारांनी  www.mcgm.gov.in या वेबसाइटला भेट द्यावी. 

या भरती मोहिमेद्वारे, एकूण 1 हजार 846 पदांवर पात्र उमेदवारांची नियुक्ती केली जाईल. त्यापैकी ५०६ पदे सर्वसाधारण प्रवर्गातील उमेदवारांसाठी आहेत. BMC च्या या पदांसाठी अर्ज करण्याची आणि फी भरण्याची शेवटची तारीख 9 सप्टेंबर आहे. तसेच सामान्य श्रेणीतील उमेदवारांना 1 हजार रुपये शुल्क भरावे लागेल. तर आरक्षित वर्गासाठी 900 रुपये शुल्क असणार आहे. 

उमेदवारांची निवड ऑनलाइन परीक्षेच्या आधारे केली जाईल. सर्व प्रथम, ऑनलाइन चाचणी घेतली जाईल, हा 200 गुणांचा पेपर असेल ज्यामध्ये बहुपर्यायी प्रश्न विचारले जातील. त्यानंतर या गुणांच्या आधारे गुणवत्ता यादी तयार केली जाईल.

या पदांसाठी अर्ज करण्यासाठी, उमेदवाराने मान्यताप्राप्त मंडळातून माध्यमिक शाळा परीक्षा उत्तीर्ण केलेली असणे आवश्यक आहे. यासोबतच मान्यताप्राप्त विद्यापीठातून पदवीधर झालेले उमेदवारही अर्ज करू शकतात. यासोबतच उमेदवाराला संगणकाचे ज्ञान आवश्यक आहे. उमेदवाराची वयोमर्यादा 18 ते 38 वर्षे असणे गरजेचे आहे. उर्वरित आरक्षित प्रवर्गाला सरकारी नियमांनुसार वयात सवलत मिळणार आहे.