MPSC पेपर फुटी प्रकरणी 6 जणांना अटक; क्लास संचालक, MPSC तील अधिकारी , विद्यार्थ्यांच्या नातेवाईकांचा समावेश
MPSC औषध निरीक्षक (Drug Inspector) परीक्षा पेपरफुटी प्रकरण: वरिष्ठ अधिकाऱ्यांना अटक; या तपासामुळे MPSC च्या परीक्षा पद्धतीवर गंभीर प्रश्नचिन्ह निर्माण झाले आहे.
Eduvarta
एज्युवार्ता न्यूज नेटवर्क
गेल्या काही दिवसांपासून गाजत असलेल्या महाराष्ट्र लोकसेवा आयोगाच्या अन्न व औषध प्रशासन विभागातील औषध निरीक्षक परीक्षेच्या पेपर फुटी प्रकरणे गुन्हे शाखेने मोठी कारवाई करत सहा जणांना अटक केली आहे. एमपीएससीच्या अप्पर सचिवांसह ,तीन अधिकारी, क्लास संचालक आणि विद्यार्थ्यांच्या नातेवाईकांचा समावेश आहे. या सर्व आरोपींना न्यायालयाने पोलीस कोठडी सुनावली आहे.
औषध निरीक्षक परीक्षेच्या पेपर फुटी प्रकरणे आरोपी विश्वेश्वर दत्तात्रय नकाते (सहाय्यक कक्ष अधिकारी एमपीएससी) अभिजीत गणपतराव लेंडवे (आवर सचिव एमपीएससी) गोपाळ मराठी (सहाय्यक कक्ष अधिकारी) यांच्यासह नंदुरबार येथील कौटिल्य अकादमी चे संचालक प्रवीण पाटील तसेच अमृत नामदेव पाटील आणि लोकेश उर्फ गौरव राजेंद्र पाटील यांना अटक करण्यात आली आहे. न्यायालयाने सर्व आरोपींना पोलीस कोठडी सुनावली असून या रॅकेटमध्ये आणखी कोणाचा सहभाग आहे याबाबत पोलिसांकडून तपास सुरू आहे.
पेपर फुटी उघडकीस आल्यानंतर एमपीएससीने तातडीने कठोर निर्णय घेत औषध निरीक्षक गट व परीक्षा रद्द केली. मात्र या प्रकरणामुळे स्पर्धा परीक्षांचा अभ्यास करणाऱ्या विद्यार्थ्यांच्या मनात आयोगाच्या कारभाराबाबत असणारी पारदर्शकतेची विश्वासार्हता कमी झाले आहे. त्यामुळेच आता आयोगाच्या अध्यक्ष व सचिवांचा राजीनामा मागितला जात आहे. पेपर फुटी प्रकरणाचा मुख्य सूत्रधार कोण आहे, हे समोर आले पाहिजे, अशी मागणी विद्यार्थ्यांकडून केली जात आहे. दरम्यान आमदार रोहित पवार यांनी पेपर पोटी प्रकरणाबाबत भूमिका घेतली होती. आता पेपर रद्द करावा लागल्यामुळे आयोगाच्या अध्यक्षांचा राजीनामा मागण्यासाठी रोहित पवार येत्या 1 सप्टेंबर रोजी एमपीएससीच्या कार्यालयावर आंदोलन करणार आहेत.
या अटकमोहिमेनंतर पेपरफुटीच्या तपासात आणखी मोठे खुलासे होण्याची शक्यता आहे. उच्चपदस्थ अधिकाऱ्यांचा सहभाग समोर आल्याने संपूर्ण परीक्षा यंत्रणेवर प्रश्नचिन्ह निर्माण झाले आहे. उमेदवारांच्या भवितव्याशी खेळणाऱ्या या प्रकारावर कडक कारवाई होणे आवश्यक आहे, अशी मागणी सर्वत्र होत आहे.
