कुलसचिव निवडीवरून विद्यापीठ पुन्हा तापले; संघटनेने घेतली कुलगुरूंची भेट 

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University)कुलसचिव पदाच्या (the post of Registrar)निवडीसाठी नियुक्त केलेल्या समितीने पात्र उमेदवारची निवड केली असून संबंधित उमेदवाराला नियुक्तीचे पत्र देण्यात आले असल्याची माहिती चर्चा केली जात आहे. मात्र, विद्यापीठाने कुलसचिव पदी आरोप असलेल्या व्यक्तीची निवड करू नये, या मागणीसाठी विद्यापीठातील कर्मचारी संघटनांनी विद्यापीठाचे कुलगुरू डॉ.सुरेश गोसावी (Vice Chancellor Dr. Suresh Gosavi) यांच्याशी मंगळवारी चर्चा केली.त्यामुळे कुलसचिव निवडीवरून काही दिवस शांत असलेले विद्यापीठ पुन्हा एकदा चर्चेत आले आहे. 

 विद्यापीठाचे कुलसचिव पद सुमारे सात महिन्यांपासून रिक्त आहे.विद्यापीठाने कुलसचिव निवडीची प्रक्रियाही पूर्ण केली.तसेच मुलाखत दिलेल्या उमेदवारामधून एका उमेदवाराची कुलसचिव पदासाठी निवड करण्याचे निश्चित केले.मात्र, विद्यापीठाचे कुलगुरू डॉ.सुरेश गोसावी हे सुमारे आठ दिवस ऑस्ट्रेलिया दौऱ्यावर गेले होते.त्यामुळे निवड प्रक्रिया थांबली होती. कुलगुरू शुक्रवारी पुन्हा पुण्यात दाखल झाले. त्यानंतर सोमवारी किंवा मंगळवारी नियुक्तीची प्रक्रिया पूर्ण केली जाईल,अशी शिक्षण वर्तुळात चर्चा होती.मात्र, मंगळवारी विद्यापीठ कर्मचारी संघटनेचे सुनील धिवार, संतोष मदने, अधिसभा सदस्य डॉ.हर्ष गायकवाड आदींनी कुलगुरू यांची भेट घेतली.तसेच कुलसचिव निवडीबाबत कुलगुरू यांच्याशी चर्चा केली. 

कुलसचिव पदासाठी वादग्रस्त व्यक्तीची निवड करण्यात आली असल्याचा आरोप काही संघटनांनी केला होता. तसेच संबंधित व्यक्तीची निवड कुलसचिव पदी करू नये,असे पत्रही विद्यापीठ प्रशासनाला देण्यात आले होते. परंतु, तरीही विद्यापीठ वादग्रस्त व्यक्तीची निवड करणार असल्याची चर्चा विद्यापीठ वर्तुळात सुरू झाली.त्यामुळे कर्मचारी संघटनेच्या पदाधिऱ्यांनी कुलगुरू यांची भेट घेऊन या विषयावर संवाद साधला.

---------------------------------

सावित्रीबाई फुले पुणे विद्यापीठ अमृतमहोत्सव साजरा करित असताना कुलसचिव पदी निष्कलंक व चारित्र्यसंपन्न व्यक्तिची नियुक्ती व्हावी.शिपाई पदासाठी कॅरेक्टर सर्टिफिकीट घेतले जाते.तसेच कुलसचिव पदासाठी सुध्दा हवे. कुलगुरू हे विद्यापीठाचे प्रमुख आहेत.त्यामुळे वादग्रस्त व्यक्तीची निवड केल्यास कुलगुरू यांच्या विरोधात जनआंदोलन उभे करावे लागेल. 

- हर्ष गायकवाड, अधिसभा सदस्य, सावित्रीबाई फुले पुणे विद्यापीठ,पुणे

------------------------

कुलसचिव पदी कोणाची नियुक्ती झाली हे अद्याप अधिकृतपणे जाहीर झालेले नाही.त्यापूर्वीच कोणाची निवड होणार आहे, यावर सध्या चर्चा केली जात आहे.त्यामुळे विद्यापीठाने सर्व नियमांचे पालन करून योग्य उमेदवाराची निवड केली असेल तर संबंधित व्यक्तीची नियुक्ती का ? केली जात नाही.त्याचप्रमाणे विद्यापीठ प्रशासनाने विधी विभागाचा सल्ला घेतला असल्याचे सुध्दा बोलले जात असून विधी विभागाने सकारात्मक अहवाल दिला आहे.,अशीही चर्चा आहे. तरीही कुलसचिव पदासाठी निवड केलेल्या उमेदवाराची नियुक्ती का केली जात नाही,अशीही सकारात्मक चर्चाही शिक्षण क्षेत्रातील निष्पक्षपाती अभ्यासकांकडून केली जात आहे.