कुलसचिव पद निवडीचा निर्णय एका दिवसात घेणार ...

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या कुलसचिव (Savitribai Phule Pune University Registrar)पदाची निवड प्रक्रिया अद्याप पूर्ण न झाल्यामुळे याबाबत युवासेना शहर प्रमुख राम थरकुडे (Yuva Sena City Chief Ram Tharkude)यांनी विद्यापीठाला पत्र दिले होते.तसेच सोमवारी (दि.22 जुलै ) एक दिवस उपोषणही केले. त्यावर कुलसचिव पदाची नियुक्तीची प्रक्रिया पुढील एका दिवसात पूर्ण करण्यात येईल, असे लेखी पत्र विद्यापीठ प्रशासनाकडून थरकुडे यांना दिले आहे. त्यामुळे विद्यापीठ प्रशासनाने कुलसचिव पदाच्या निवडीबाबत अंतिम निर्णय घेतला असून लवकरच विद्यापीठाला पूर्णवेळ कुलसचिव (Full Time Registrar)मिळतील,असे विद्यापीठाने दिलेल्या पत्रावरून स्पष्ट होत आहे.

सावित्रीबाई फुले पुणे विद्यापीठाला पूर्णवेळ कुलसचिव नसल्यामुळे विद्यार्थ्यांचे अनेक प्रश्न प्रलंबित आहेत. त्यामुळे विद्यापीठाने लवकरात लवकर पूर्णवेळ कुलसचिव नियुक्त करावेत, या मागणीसाठी राम थरकुडे यांनी सोमवारी विद्यापीठात उपोषण केले. त्यावर विद्यापीठाचे कुलगुरू डॉ. सुरेश गोसावी  व प्र- कुलगुरू डॉ. पराग काळकर यांनी थरगुडे यांची भेट घेतली. थरकुडे यांनी मागण्या मान्य झाल्यानंतर उपोषण सोडले.

एज्युवार्ताशी बोलताना राम थरकुडे म्हणाले, गेल्या एक वर्षापासून विद्यापीठाला पूर्णवेळ कुलसचिव नाही. सध्या नवीन शैक्षणिक वर्ष सुरू झाले असून प्रवेशाचा काळ सुरू झाला आहे. अनेक विद्यार्थ्यांचे वसतिगृहाचे, सुरक्षेचे प्रश्न एरणीवर आहेत. त्यामुळे कुलसचिवांची नियुक्ती होणे महत्त्वाचे आहे. विद्यापीठ प्रशासनाने कुलसचिव पदासाठी प्रक्रिया राबवून देखील कुलसचिव पदाचे नाव घोषित केले जात नाही. विद्यापीठ प्रशासनाने विद्यार्थ्यांचे प्रश्न समोर ठेवून तातडीने कुलसचिवांची नेमणूक करावी. विद्यापीठाची प्रतिमा मधील होणार नाही.  तसेच विद्यापीठाला चांगल्या उंचीवर घेऊन जाणारे कुलसचिव मिळावेत, असे पत्र विद्यापीठाला दिले होते. त्यावर एका दिवसात कुलसचिवांची नियुक्ती प्रक्रिया पूर्ण केली जाईल, असे लेखी पत्र विद्यापीठाने दिले आहे.