राज्य शासनाकडून छायाचित्र, लघुपट, रिल्स स्पर्धेचे आयोजन; विजेत्यांना हजारोंची बक्षिसे

एज्युवार्ता न्यूज नेटवर्क 

राज्य शासनाकडून राज्याचे प्रगतीचे दृकश्राव्य माध्यमातून दर्शन घडावे , याकरिता राज्य शासनाच्या माहिती व जनसंपर्क मंत्रालयाकडून (Ministry of Information and Public Relations) राज्याच्या ऐतिहासिक वारसा , प्राचीन तसेच सरकारच्या विविध महत्त्वाकांशी योजनांवर आधारित छायाचित्र, लघुपट, रिल्स स्पर्धेचे आयोजन (Organizing photography, short film, reels competition) करण्यात आले आहे. स्पर्धेत सहभागी होणाऱ्या उमेदवाराला १५ सप्टेंबरपर्यंत अर्ज करावा (September 15 application deadline) लागणार आहे. अधिक माहितीसाठी स्पर्धकांनी https://mahasamvad.in/141329/ वर क्लिक करावे. 

‘महाराष्ट्र माझा’ या संकल्पनेवर आधारित महाराष्ट्राचे कृषी, शैक्षणिक, सामाजिक, सांस्कृतिक, जलसंधारण, जलसंपदा, पायाभूत सुविधा, आरोग्य, पर्यटन आणि पर्यावरण, वने आदी योजनांशी संबंधित छायाचित्र, रिल्स आणि लघुपट स्पर्धेसाठी पाठवता येतील. स्पर्धेत भाग घेऊ इच्छिणाऱ्यांनी dgiprdlo@gmail.com या ई-मेल आयडीवर १५ सप्टेंबर २०२४ पर्यंत अर्ज पाठवावीत. सोबत आपले नाव, संपूर्ण पत्ता, मोबाइल नंबर आणि छायाचित्र कोणत्या ठिकाणचे आहे याची माहिती देणे आवश्यक आहे.

प्रथम, द्वितीय आणि तृतीय क्रमांकासाठी निवड झालेल्या छायाचित्र, रिल्स आणि लघुपटांना अनुक्रमे २५ हजार रुपये, २० हजार रुपये आणि १५ हजार रुपयांचे पारितोषिक प्रदान केले जाणार असून तीन हजार रुपयांची पंधरा उत्तेजनार्थ बक्षिसे देण्यात येणार आहेत. या स्पर्धेत प्राप्त झालेल्या छायाचित्रांपैकी दर्जेदार छायाचित्रांचे, मंत्रालयातील त्रिमूर्ती प्रांगणात तसेच राज्यभरात प्रदर्शन भरविण्यात येणार आहे. तसेच रिल्स आणि लघुपटांना शासनाच्या समाजमाध्यमांवरून प्रसिद्धी देण्यात येईल. राज्यभरातून प्राप्त दर्जेदार छायाचित्रांची, प्रदर्शनासाठी निवड करण्यासाठी तज्ज्ञांची समिती नेमण्यात येणार आहे.