नागपूर विद्यापीठाचे माजी कुलगुरू डॉ. सुभाष चौधरी यांचे निधन
डॉ. सुभाष चौधरी यांच्यावर यकृताशी संबंधित आजारावर नागपूर येथे खासगी रुग्णालयात उपचार सुरू होते. आज गुरूवारी दि. २६ रोजी सकाळी त्यांची तब्येत अचानक खालावली आणि त्यातच त्यांची प्राणज्योत मालवली.
eduvarta@gmail.com 
एज्युवार्ता न्यूज नेटवर्क
राष्ट्रसंत तुकडोजी महाराज नागपूर विद्यापीठाचे (Rashtrasant Tukdoji Maharaj Nagpur University) माजी कुलगुरू डॉ. सुभाष चौधरी (Former Vice Chancellor Dr. Subhash Chaudhary) यांचे उपचारादरम्यान निधन झाले आहे. यांच्यावर यकृताशी संबंधित आजारावर नागपूर येथे खासगी रुग्णालयात उपचार सुरू होते. गुरूवारी दि. २६ रोजी सकाळी त्यांची तब्येत अचानक खालावली आणि त्यातच त्यांची (Dr. Death of Subhash Chaudhary) प्राणज्योत मालवली. त्यांच्या या अचानक झालेल्या निधनाने शैक्षणिक क्षेत्रात हळहाळ व्यक्त केली जात आहे.
डॉ. चौधरी यकृताशी संबंधित आजारावर मागील काही महिन्यांपासून उपचार घेत होते. त्यासाठी काही दिवसांपूर्वी त्यांना नागपुरातील खासगी रुग्णालयात दाखल करण्यात आले. मागील आठवड्यात रात्री प्रकृती अधिकच खालावल्याने त्यांना उपचारांसाठी मुंबई येथे नेण्याचा निर्णय निकटवर्तीयांनी घेतला होता. मात्र, वेळेत एअर अॅम्ब्युलन्स न मिळाल्याने त्यांच्यावर नागपूरातील खाजगी रुग्णालयातच उपचार सुरू होता. परंतु, यात डॉक्टरांना यश न मिळाल्याने अखेर गुरूवारी सकाळी त्यांचे निधन झाले.
डॉ. सुभाष चौधरी यांनी स्थापत्य अभियांत्रिकी विषयात पदव्युत्तर पदवी तसेच पी.एचडी प्राप्त केली होती. त्यांना अध्यापन, संशोधन तसेच प्रशासन क्षेत्रात व्यापक अनुभव होता. ८ ऑगस्ट २०२० मध्ये त्यांनी राष्ट्रसंत तुकडोजी महाराज नागपूर विद्यापीठाच्या कुलगुरू पदाची धुरा सांभाळली. मात्र, या काळात त्यांची कारकीर्द सतत वादाच्या भोवऱ्यात सापडली आहे.
डॉ. चौधरी यांना २१ फेब्रुवारी २०२४ ला कुलपतींनी निलंबित केले होते. मात्र, निलंबन करताना अपेक्षित कायदेशीर प्रक्रियेचे पालन न झाल्याचा ठपका ठेवत न्यायालयाने डॉ. चौधरींचे निलंबन रद्द करण्याचा आदेश दिला होता. त्यानंतर डॉ. चौधरी यांनी ११ एप्रिल रोजी पुन्हा पदभार स्वीकारला. परंतु, यानंतर लगेच उच्च व तंत्रशिक्षण विभागाचे उपसचिव अशोक मांडे यांच्या समितीकडून चौकशी सुरू करण्यात आली. ही चौकशी पूर्ण झाल्यानंतर कुलपतींनी चौधरी यांना ४ जुलै रोजी कुलपतींनी दुसऱ्यांदा निलंबित केले. यासंदर्भात सध्या कारवाई सुरू आहे.
मध्य भारतातील सर्वात जुने विद्यापीठ असलेल्या नागपूर विद्यापीठाच्या शतकोत्तर महोत्सवी सोहळा हा कुलगुरू चौधरींच्या काळात झाला.या सोहळ्याच्या निमित्त वर्षभर विविध उपक्रम विद्यापीठांमध्ये राबवण्यात आले. यासाठी राष्ट्रपती, उपराष्ट्रपती यांच्यासह अनेक मान्यवरांनी विद्यापीठाच्या कार्यक्रमाला उपस्थिति दर्शवली. यासोबतच जानेवारी २०२३ मध्ये नागपूर विद्यापीठात सुभाष चौधरी यांच्या नेतृत्वात इंडियन सायन्स काँग्रेसचे यशस्वी आयोजन करण्यात आले होते.
