नागपूर विद्यापीठच्या कुलगुरूंचे अखेर निलंबन ; या कुलगुरूंकडे सोपवली विद्यापीठाची जबाबदारी

एज्युवार्ता न्यूज नेटवर्क 

राज्यपाल व कुलपती रमेश बैस (Chancellor Ramesh Bais) यांनी राष्ट्रसंत तुकडोजी महाराज नागपूर विद्यापीठचे कुलगुरू डॉ. सुभाष चौधरी (Nagpur University Vice Chancellor Dr. Subhash Chaudhary)यांच्यावर निलंबनाची (Suspension )कारवाई केली आहे.चौधरी यांच्यावर एकदा नाही तर दोन वेळा निलंबनाची कारवाई झाली आहे. त्यामुळे रिक्त झालेल्या कुलगुरू पदाचा प्रभारी कार्यभार गोंडवाना विद्यापीठाचे कुलगुरू डॉ.प्रशांत बोकारे (Gondwana University Vice Chancellor Dr. Prashant Bokare)यांच्याकडे सूपूर्द करण्यात आला असल्याची माहिती राज्यपाल कार्यालयाकडून प्राप्त झाली आहे.

नागपूर विद्यापीठाचे कुलगुरू डॉ. सुभाष चौधरी यांच्या विरोधात प्राप्त झालेल्या अनेक तक्रारीविरोधात राज्यपाल यांनी चौकशी समिती स्थापना केली होती. चौकशी समितीने दिलेल्या अहवालाच्या आधारे राज्यपाल यांनी चौधरी यांच्यावर निलंबनाची कारवाई केली होती. मात्र न्यायालयाने या निलंबनाला स्थगिती दिली होती. त्यानंतर चौधरी पुन्हा रुजू झाले होते .त्यानंतर पुन्हा एकदा राज्यपाल रमेश बैस यांनी चौधरी यांच्या चौकशीचे आदेश दिले होते .त्यावर चौधरी यांनी या चौकशीला आव्हान देणारी याचिका न्यायालयात दाखल केली. परंतु, न्यायालयाने चौकशीवर अंतरिम स्थगिती देण्यास नकार दिला. त्यानंतर चौधरी यांना लेखी उत्तर सादर करण्यास सांगितले होते .तसेच चौकशीसाठी राज्यपाल कार्यालयात बोलावले होते.

चौधरी यांनी सादर केलेल्या लेखी उत्तराने राज्यपाल यांचे समाधान झाले नाही. त्यामुळे राज्यपाल यांनी चौधरी यांना राजीनामा देण्यास सांगितले होते. मात्र, राजीनामा देण्यास नकार दिल्यानंतर चौधरी त्यांच्यावर दुसऱ्यांदा निलंबनाची कारवाई करण्यात आली. त्यामुळे नागपूर विद्यापीठाचे कुलगुरू पद रिक्त झाले आहे.परिणामी पुढील काळात नागपूर विद्यापीठाच्या कुलगुरू पदासाठी नव्याने निवड प्रक्रिया राबवावी लागणार आहे.