देशात अन् राज्यात हिंदुत्ववादी सरकार; मात्र शिवरायांचा इतिहास ६८ शब्दांत, सत्ताधारी आमदारांचा संताप
सीबीएसईच्या इयत्ता १ ली ते १२ वी पर्यंतच्या संपूर्ण अभ्यासक्रमात २ हजार २०० पानांचा इतिहास आहे; परंतु त्यात छत्रपती शिवाजी महाराज यांच्या जीवनावर केवळ १ धडा आहे. त्या धड्यांमध्ये केवळ ६८ शब्दांमध्ये त्यांचे कार्य, नेतृत्व आणि इतिहास मांडण्यात आला आहे. हे अपमानास्पद असल्याची टीका करून विधान परिषदेतील आमदारांनी संताप व्यक्त केला.
eduvarta@gmail.com 
एज्युवार्ता न्यूज नेटवर्क
सीबीएसईचा पॅटर्न (CBSE pattern) कित्येक वर्षे इंग्रजी शाळांमध्ये राबवत आहोत. परंतु, राज्य आणि केंद्रात हिंदुत्ववादी सरकार असूनही अद्याप छत्रपती शिवाजी महाराजांचा इतिहास (History of Chhatrapati Shivaji Maharaj) विद्यार्थ्यांपर्यंत पोहोचला नाही ही गंभीर बाब आहे, असा संताप सत्ताधारी आमदार भावना गवळी (MLA Bhavana Gawli) यांनी विधानपरिषद व्यक्त केला. आतापर्यंत छत्रपती शिवाजी महाराजांचे कार्य हे अभ्यासाच्या माध्यमातून जगासमोर यायला पाहिजे होते, असे त्या म्हणाल्या.
सीबीएसईच्या इयत्ता १ ली ते १२ वी पर्यंतच्या संपूर्ण अभ्यासक्रमात २ हजार २०० पानांचा इतिहास आहे.परंतु, त्यात छत्रपती शिवाजी महाराज यांच्या जीवनावर केवळ १ धडा आहे. त्या धड्यांमध्ये केवळ ६८ शब्दांमध्ये त्यांचे कार्य, नेतृत्व आणि इतिहास मांडण्यात आला आहे. हे अपमानास्पद असल्याची टीका करून विधान परिषदेतील आमदारांनी संताप व्यक्त केला.
‘‘छत्रपती शिवाजी महाराज आणि छत्रपती संभाजी महाराज यांचा इतिहास गडांच्या रूपाने आपण जागतिक स्तरावर घेऊन जाण्यात यशस्वी झालो आहोत; परंतु, त्यांचा इतिहास पुस्तकांमध्ये अतिशय अल्प प्रमाणात देण्यात आला, हे मान्य आहे. केंद्रीय शिक्षणमंत्र्यांशी झालेल्या चर्चेनुसार ‘राष्ट्रीय शैक्षणिक संशोधन आणि प्रशिक्षण परिषदे’समवेत झालेल्या बैठकीत छत्रपती शिवाजी महाराजांचा इतिहास इ. ७ ते १० वीच्या अभ्यासक्रमात घेण्याविषयी आश्वासन देण्यात आले आहे, असे यावर उत्तर देताना गृहराज्यमंत्री डॉ. पंकज भोयर म्हणाले.
___________________________________________
सीबीएसईच्या माध्यमातून देशातल्या प्रत्येक मुलांपर्यंत शिवाजी महाराजांचा इतिहास गेला पाहिजे. प्रस्ताव पाठवून हात झटकण्याची ही उदासीनता चालणार नाही. शिक्षणमंत्र्यांनी स्वतः दिल्लीला जाऊन चर्चा करायला हवी होती.
- विधानपरिषध आमदार सत्यजित तांबे
