आजी-माजी प्राचार्य बसवले मुख्याध्यापकांच्या यादीत;राज्य मंडळ कार्यकारी समितीवर अशासकीय सदस्यांचे नामनिर्देशन
शिक्षण तज्ञ म्हणून मुंबईतील रमेश देशपांडे, पुण्यातील डॉ.सुधाकर बोकेफोडे, रत्नागिरी जिल्ह्यातील आकाश तांबे, हरिदास सोमवंशी ,प्रमोद पाटील, सुनील मगदूम यांचे नामनिर्देशन करण्यात आले आहे.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य माध्यमिक व उच्च माध्यमिक शिक्षण मंडळाच्या (Maharashtra State Board of Secondary and Higher Secondary Education)कार्यकारी समितीच्या रिक्त पदांवर शालेय शिक्षण मंत्री यांच्या शिफारसीनुसार नामनिर्देशनाने अशासकीय सदस्यांची नियुक्ती (Appointment of Non-Government Members)करण्यात आली आहे. मात्र,त्यात मुख्याध्यापक सदस्य (Principal Member)संवर्गात वरिष्ठ महाविद्यालयाच्या आजी-माजी प्राचार्यांचा समावेश करण्यात आला आहे. त्याचप्रमाणे प्राचार्य, व्यवस्थापन प्रतिनिधी, शिक्षणतज्ञ यांचाही यादीमध्ये समावेश करण्यात आला आहे.
राज्याच्या शालेय शिक्षण विभागातर्फे 15 ऑक्टोबर रोजी अध्यादेश प्रसिद्ध करण्यात आला आहे. या अध्यादेशात नामनिर्देशित झालेल्या सदस्यांची योग्य तपासणी करून महाराष्ट्र राज्य माध्यमिक व उच्च माध्यमिक शिक्षण मंडळ, पुणे यांच्या कार्यकारणी समितीवर सदस्यांचा समावेश करण्यात यावा,अशा अशासकीय सदस्यांचे समावेशन व संबंधित संपूर्ण योग्य ती कार्यवाही राज्य मंडळाचे अध्यक्ष यांनी आपल्या स्तरावरून करावी, असे आदेश राज्य शासनाच्या कार्यासन अधिकारी मृणाली काटेंगे यांनी अध्यादेशाद्वारे दिले आहेत.
महाराष्ट्र राज्य माध्यमिक व उच्च माध्यमिक शिक्षण मंडळ, पुणे यांच्या कार्यकारी समितीवर अशासकीय सदस्यांचे नामनिर्देशन करण्यात आले आहे.त्यात अशासकीय मुख्याध्यापक सदस्य संवर्गात खडकी येथील टिकाराम जगन्नाथ महाविद्यालयाचे प्राचार्य डॉ.संजय चाकणे यांचा समावेश करण्यात आला आहे. तसेच बाळासाहेब झावरे हे सुद्धा एका सीनियर कॉलेजचे माजी प्राचार्य आहेत. मुख्याध्यापक संवर्ग सदस्य म्हणून कोल्हापूर जिल्ह्यातील शिरोळ तालुक्यातील अशोक सिताराम निर्मळे, हेरवाड हायस्कूल यांची नियुक्ती करण्यात आली आहे. तसेच यवतमाळ जिल्ह्यातील दत्तात्रेय राघोजी राहणे, महात्मा ज्योतिबा फुले विद्यालय, भरत गावडे, बुलढाणा जिल्ह्यातील विद्या विकास विद्यालयाचे सुनील जवंजाळ यांचे नाव समाविष्ट करण्यात आले आहे. तर शिक्षण शास्त्र महाविद्यालयाचे प्राचार्य म्हणून अहमदनगर जिल्ह्यातील प्रगत माध्यमिक व उच्च माध्यमिक विद्यालय नवी पेठ येथील सुनील पांडुरंग पंडित यांचे नाव या यादीत देण्यात आले आहे.
कनिष्ठ महाविद्यालयाचे प्राचार्य या संवर्गात कोल्हापूर जिल्ह्यातील समर्थ कनिष्ठ महाविद्यालयाचे मिलिंद पांगिरेकर, पुण्यातील एम ई एस कॉलेजचे गोविंद कुलकर्णी, अमरावती जिल्ह्यातील बाळापूर तालुक्यातील नरेंद्र लखाडे, लातूर जिल्ह्यातील कै.रसिका महाविद्यालयाचे डॉ.चंद्रकांत जावळे, अकोला जिल्ह्यातील शिवाजी विद्यालय व कनिष्ठ महाविद्यालयाचे संतोष चरपे, नागपूर जिल्ह्यातील न्यू इंग्लिश हायस्कूल व ज्युनिअर कॉलेजचे अमेय एदलाबादकर यांच्या नावाचा समावेश करण्यात आला आहे.व्यवस्थापन प्रतिनिधी या संवर्गात सोलापूर जिल्ह्यातील सतीश कुमार दरेकर, मुंबईतील महादेव जगताप कोल्हापूर मधील रफिक पटेल, नंदुरबार जिल्ह्यातील चंद्रशेखर पाटील, पुण्यातील महर्षी कर्वे स्त्री शिक्षण संस्थेच्या सीमा कांबळे, विद्याधर जगताप यांचा या यादीत समावेश असून शिक्षण तज्ञ म्हणून मुंबईतील रमेश देशपांडे, पुण्यातील डॉ.सुधाकर बोकेफोडे, रत्नागिरी जिल्ह्यातील आकाश तांबे, हरिदास सोमवंशी ,प्रमोद पाटील, सुनील मगदूम यांचे नामनिर्देशन करण्यात आले आहे.
