छत्रपती शिवाजी महाराज यांच्या जीवन व कार्यावर विद्यापीठात राष्ट्रीय परिषद

एज्युवार्ता न्यूज नेटवर्क 

सावित्रीबाई फुले पुणे विद्यापीठात (Savitribai Phule Pune University)येत्या शुक्रवारी आणि शनिवारी (दि.३०, ३१ ऑगस्ट) ' छत्रपती शिवाजी महाराज (Chhatrapati Shivaji Maharaj)यांच्या जीवन व कार्याचे २१ व्या शतकातील महत्त्व आणि समयोचितता ' या विषयावर राष्ट्रीय परिषदेचे (National Conference)आयोजन करण्यात आले आहे. राज्याचे उच्च व तंत्रशिक्षण मंत्री चंद्रकात पाटील (Higher and Technical Education Minister Chandrakat Patil)आणि महसूलमंत्री राधाकृष्ण विखे पाटील (Revenue Minister Radhakrishna Vikhe Patil)यांच्या हस्ते परिषदेचे शुक्रवारी उद्घाटन होणार आहे.विद्यापीठाचे कुलगुरू डॉ. सुरेश गोसावी (Vice Chancellor Dr. Suresh Gosavi) हे या कार्यक्रमाच्या अध्यक्षस्थानी असतील.या वेळी इरावती कर्वे सामाजिक शास्त्र संकुलातील नव्या सभागृहाचे उद्घाटन; तसेच, विद्यापीठाच्या अमृतमहोत्सवानिमित्त विशेष टपाल तिकिटाचे प्रकाशनही होणार आहे. 

सावित्रीबाई फुले पुणे विद्यापीठाच्या अमृतमहोत्सवानिमित्त छत्रपती शिवाजी महाराजांच्या राज्याभिषेकाला ३५० वर्षे पूर्ण झाल्याच्या निमित्ताने आंतरविद्याशाखीय व बहुभाषिक राष्ट्रीय परिषदेचे आयोजन केले जाणार आहे. विद्यापीठाचा संज्ञापन व वृत्तपत्रविद्या विभाग, तत्त्वज्ञान विभाग व बहिःशाल शिक्षण मंडळ, भारत इतिहास संशोधक मंडळ, श्री शिवाजी रायगड स्मारक मंडळ आणि डेक्कन महाविद्यालय अभिमत विद्यापीठ यांनी परिषदेतील विविध सत्रे व विशेष व्याख्यानांचे नियोजन केले आहे.

राष्ट्रीय परिषदेच्या उद्घाटन प्रसंगी इंडियन कौन्सिल फॉर कल्चरल रिलेशन्सचे माजी अध्यक्ष आणि माजी राज्यसभा सदस्य डॉ. विनय सहस्रबुद्धे मार्गदर्शन करणार आहेत. ज्येष्ठ विचारवंत व अभ्यासक डॉ. सदानंद मोरे यांचे राष्ट्रीय परिषदेची भूमिका मांडणारे बीजभाषण होईल. डेक्कन महाविद्यालय अभिमत विद्यापीठाचे कुलगुरू डॉ. प्रमोद पांडे, लेफ्टनंट जनरल राजेंद्र निंभोरकर (निवृत्त), व्हाइस अॅडमिरल मुरलीधर पवार (निवृत्त), एअर मार्शल भूषण गोखले (निवृत्त) आदी मान्यवर या वेळी उपस्थित राहणार आहेत, असे विद्यापीठातर्फे कळविण्यात आले आहे. 

परिषदेचा समारोप शनिवारी दु. ४.०० वाजता होणार असून या कार्यक्रमास केंद्रीय सहकार व नागरी हवाई वाहतूक राज्यमंत्री मुरलीधर मोहोळ व खासदार मेधा कुलकर्णी उपस्थित राहणार आहेत.यावेळी ज्येष्ठ अभ्यासक डॉ. गो. बं. देगलूरकर उपस्थितांना मार्गदर्शन करतील.भारत इतिहास संशोधक मंडळाचे अध्यक्ष प्रदीप रावत या कार्यक्रमाच्या अध्यक्षस्थानी असतील.