नाशिकात खासगी क्लासेसच्या कार्यक्रमावरून परताना ६ विद्यार्थ्यांसह ३ पालकांवर काळाचा घाला...

एज्युवार्त न्यूज नेटवर्क 

नाशिकमधून (Nashik Car Accident) एक हृदयद्रावक घटना (Heartbreaking Incident) समोर आली आहे. दिंडोरी येथे घडलेल्या एका भीषण अपघाताने संपूर्ण राज्य हादरले आहे. खासगी क्लासेसचा (Private Coaching Classes) कार्यक्रम संपवून गावाकडे परतत असताना काळाने ९ जणांवर (9 people killed in accident) घाला घातला आहे. यामध्ये एकाच कुटुंबातील ५ जणांचा समावेश असून इतर चार जण नातेवाईक असल्याचे सांगितले जात आहे. संबंधित कोचिंग क्लासेस मध्ये शिकणाऱ्या ६ विद्यार्थ्यांसह ३ पालकांचा समावेश होता. 

मिळालेल्या माहितीनुसार, दरगोडे कुटुंबातील पाच सदस्य आणि त्यांच्या नाते संबंधातील ४ सदस्य असे एकूण ९ जण एका खाजगी कोचिंग क्लासेसच्या  स्नेहसंमेलन कार्यक्रमाला गेले होते. कार्यक्रम आटपून दरगोडे कुटुंब घरी येत असताना भरधाव वेगात धावणाऱ्या त्यांचा कार चालकाचे कारवरील नियंत्रम सुटल्याने कार थेट विहिरीत कोसळली. या दुर्दैवी घटनेत गाडीत असलेल्या नऊ जणांचा जागीच मृत्यू झाला. 

शिवाजी नगर परिसरात असलेल्या एका विहिरीत एमएच-१५ जेएस -१०५३ क्रमांकाची कार कोसळली. अपघात होताच मोठा आवाज झाल्याने परिसरातील नागरिक घटनास्थळी धावून आले. त्यांनी तत्काळ प्रशासनाला कळवून बचावकार्य सुरू केले. मात्र विहिरीत मोठ्या प्रमाणात पाणी असल्याने आणि अंधारामुळे बचावकार्य करताना अनेक अडचणी आल्या. 

प्रदिर्घ कालावधीनंतर कार क्रेनच्या सहाय्याने विहिरीतून बाहेर काढण्यात आली. कार बाहेर काढल्यानंतर त्यामध्ये एकूण नऊ जण असल्याचे स्पष्ट झाले. सगळ्यात  दुर्दैव म्हणजे त्या कारमध्ये असलेल्या सर्वांचा मृत्यू झाला होता. या अपघातातील मृतांमध्ये दरगोडे कुटुंबातील सुनील दत्तू दरगोडे, राखी सुनील दरगोडे, उषा अनिल दरगोडे, श्रद्धा अनिल दरगोडे, श्रावणी अनिल दरगोडे अशा एकाच कुटुंबातील पाच सदस्यांचा समावेश होता. याशिवाय उर्वरित चार जण हे त्यांचे नातेवाईक होते. हे सर्वजण दिंडोरी तालुक्यातील इंदोरे गावचे रहिवासी होते. एका खासगी क्लासच्या कार्यक्रमावरून परत येत असताना त्यांच्यावर ही काळाने झडप घातली.