सावधान : 'आरटीई'साठी खोटी कागदपत्रे द्याल, तर कारवाईस पात्र व्हाल..

एज्युवार्ता न्यूज नेटवर्क 

आरटीईअंतर्गत (RTE) प्रवेश प्रक्रिया आजपासून सुरु झाली आहे. त्या पार्श्वभूमिवर शिक्षण विभागाने पालकांना काही सूचना दिल्या आहेत. त्यापैकी एक म्हणजे पालक दलालांच्या भूलथापांना बळी पडून खोटी कागदपत्रे (False documents) सादर करतात. तशी फसवणूक केल्याचे शिक्षण विभागाच्या निदर्शनास आली आहे. त्यामुळे यंदा फसवेगिरीला आळा घालण्यासाठी शिक्षण विभागाने कारवाईचे पाऊल उचलले आहे. जवळची शाळा मिळण्यासाठी दलालांच्या सहाय्याने पालक खोटी कागदपत्रे सादर करतात. भाडेकरार, उत्पन्नाचा दाखला, जन्म दाखला, आधारची खोटी माहिती दिल्यास कारवाई (Action against parents who submit false information) करण्यात येणार असल्याचा इशारा शिक्षण विभागाने दिला आहे.

शिक्षण हक्क कायद्यान्वये अंतर्गत मागील वर्षी अशा फसवेगिरीच्या अनेक घटना समोर आल्या होता. यंदा मात्र त्यावर चाप बसवण्याच्या दृष्टीने शिक्षण विभाने पाऊल उचलले आहेत. मागील वर्षी नागपूर जिल्ह्यात आरटीईचा मोठा गोंधळ समोर आला होता. चंद्रपुर, पुणे यासह राज्यातील अन्य काही जिल्ह्यात अशी खोटी माहिती सादर केल्याची प्रकरणे समोर आली होती. आता असा प्रकार घडू नये म्हणून शिक्षण विभाग सतर्क झाला आहे.

शाळेत प्रवेश घेताना ठरलेल्या निकषासाठी पालकांकडून खोटी माहिती देण्याचे प्रकार यापूर्वी घडले आहेत. त्यामध्ये प्रामुख्याने शाळेच्या जवळच्या निकषांमध्ये बसण्यासाठी चुकीचे भाडेकरार दिले जातात. त्याचबरोबर उत्पन्नाच्या अटीमध्ये बसण्यासाठी चुकीचा उत्पन्नाचा दाखला दिला जातो. यासाठी काही दलाल सक्रिय होतात. ते पालकांकडून हजारो रुपये घेऊन पालकांची फसवणूक करतात, त्यामुळे आता हा कारवाईचा बडगा उगारण्यात येणार आहे.