BMC लिपीक पद भरतीसाठीची 'ती' शैक्षणिक अट रद्द; 15 दिवसात नव्याने भरती राबवणार

एज्युवार्ता न्यूज नेटवर्क

मुंबई महानगरपालिकेत (Mumbai Municipal Corporation) लिपिक पदासाठी भरती प्रक्रिया (Recruitment Process for the post of Clerk) राबविण्यात येत आहे. या भरतीसाठी ‘माध्यमिक शालांत प्रमाणपत्र परीक्षा (दहावी) आणि पदवी परीक्षेत ‘प्रथम प्रयत्नात उत्तीर्ण’ ही शैक्षणिक अट लागू करण्यात आली होती. ही एक अट आता महानगरपालिका प्रशासनाने रद्द केली आहे. त्यामुळे आता नव्याने जाहिरात प्रसिद्ध (Advertisement published) करून येत्या पंधरा दिवसांच्या आत भरती प्रक्रिया पुन्हा सुरू करण्यात येणार आहे. 

बृहन्मुंबई महानगरपालिकेत कार्यकारी सहायक संवर्गातील रिक्त पदे सरळसेवेने भरण्यासाठी 20 ऑगस्ट 2024 पासून ऑनलाईन अर्ज भरती प्रक्रिया सुरु करण्यात आली होती. या भरतीसाठी माध्यमिक शालांत प्रमाणपत्र परीक्षा (दहावी) व पदवी परीक्षेत प्रथम प्रयत्नात उत्तीर्ण ही शैक्षणिक अट लागू होती. दरम्यान त्यातील प्रथम प्रयत्नात ही अट रद्द करण्याची सूचना व मागणी विविध स्तरांवरुन करण्यात आली होती. या मागणीचा विचार करीत त्यावर सकारात्मक निर्णय घेत बृहन्मुंबई महानगरपालिका प्रशासनाने प्रथम प्रयत्नात ही अट रद्द करण्याचा निर्णय घेतला आहे.

जाहिरात प्रसिद्ध होऊन  येत्या पंधरा दिवसांच्या आत ही भरती प्रक्रिया पुन्हा सुरु केली जाणार आहे. विशेष म्हणजे, सध्या अर्ज केलेल्या उमेदवारांनी नव्याने अर्ज करण्याची आवश्यकता नाही, कारण त्यांचे अर्ज पुढील भरती प्रक्रियेत ग्राह्य धरले जाणार आहेत. महानगरपालिका प्रशासनाच्या या निर्णयामुळे लाखो उमेदवारांना दिलासा मिळाला असून त्यांना या भरती प्रक्रियेत सहभागी होण्याची संधी मिळणार आहे.

बृहन्मुंबई महानगरपालिकेत कार्यकारी सहाय संवर्गातील 1 हजार 846 जागा सरळसेवेने भरण्यासाठी प्रक्रिया सुरु करण्यात आली होती. या जागांसाठी अर्हताप्राप्त उमेदवारांकडून 20 ऑगस्ट 2024 पासून ऑनलाईन अर्ज मागविण्यास प्रारंभ करण्यात आला होता. तर 9 सप्टेंबर 2024 ही अर्ज करण्याची अंतिम तारीख होती.