MIT प्रवेश परीक्षेचा 155 वर्ष जुना पेपर व्हायरल

एज्युवार्ता न्यूज नेटवर्क 

जगातील प्रतिष्ठित समजल्या जाणार्‍या मॅसॅच्युसेट्स इन्स्टिट्यूट ऑफ टेक्नॉलॉजी ( Massachusetts Institute of Technology) MIT च्या प्रवेश परीक्षेच (entrance exam) बीजगणितचा (Algebra) 155 वर्षापूर्वीचा (155 years old) पेपर सोशल मीडियावर व्हायरल होत आहे. सध्या MIT ची परिक्षाही सर्वात अवघड परीक्षांपैकी  एक समजली जाते. पण सध्या व्हायरल होत असलेला पेपर इतका सोपा आहे की, अगदी 7 वी चे ही विद्यार्थी हा पेपर सोडवू शकतात, असा दावा नेटकरी करत आहेत.  

अमेरिकेची MIT म्हणजेच 'मॅसॅच्युसेट्स इन्स्टिट्यूट ऑफ टेक्नॉलॉजी' असे त्याचे वर्णन केले जात आहे. हा पेपर 1869 चा आहे. 155 वर्षे जुन्या या पेपरमध्ये बीजगणित विभागातून 7 प्रश्न विचारण्यात आले होते. सोशल मीडियावर  गणित या विषयात  स्वारस्य असलेल्या लोकांनी हा पेपर सोडवला आहे आणि तो खूप सोपा असल्याचे सांगितले आहे. 'Reddit'  वर सामायिक केलेल्या या प्रवेश परीक्षेच्या पेपरवर  जून 1869 लिहिलेले आहे. त्यानुसार, जगातील सर्वात प्रसिद्ध संस्थांपैकी एक असलेल्या MIT च्या स्थापनेनंतर 8 वर्षांनी ही प्रवेश परीक्षा प्रसिद्ध झाली असल्याचे मानले जात आहे.

आजच्या पिढीतील ज्यांनी एमआयटी प्रवेश परीक्षेचा पेपर सोडवला आहे त्यांनी या व्हायरल झालेल्या पेपर खूप सोपा असल्याचे म्हटले आहे.  हा पेपर सोडवण्यासाठी त्यांना कॅल्क्युलेटरचीही गरज नव्हती, असा त्यांचा दावा आहे. एका यूजरच्या म्हणण्यानुसार, हे प्रश्न सोडवण्यासाठी त्याने पेन आणि कागदाचाही वापर केला नाही. एमआयटी प्रवेश परीक्षेचा पेपर सोडवण्यासाठी बीजगणिताचे प्राथमिक ज्ञान पुरेसे आहे, असा दावाही काही नेटकर्‍यांनी केला आहे.