परीक्षांचे निकाल लावा, नाहीतर...! विद्यार्थी संघटनेचा MPSC ला निर्वाणीचा इशारा
राज्यसेवा मुख्य परीक्षा-२०२२, संयुक्त पूर्व परीक्षा गट-ब आणि क - २०२३ व राज्यसेवा पूर्व परीक्षा २०२३ यांचे निकाल मागील काही महिन्यांपासून रखडलेले आहेत.
eduvarta@gmail.com 
एज्युवार्ता न्यूज नेटवर्क
महाराष्ट्र लोकसेवा आयोगाकडून (MPSC) घेण्यात येणाऱ्या विविध परीक्षांचे निकाल लांबणीवर पडण्याचे सत्र सुरूच आहे. उमेदवारांकडून सातत्याने या परीक्षांचे निकाल (MPSC Exam results) लवकरात लवकर जाहीर करण्याची मागणी होत आहे. आता मात्र उमेदवारांमध्ये नाराजी वाढू लागली असून पुढील तीन-चार दिवसांत निकाल जाहीर न केल्यास पुण्यात मोठे आंदोलन उभारण्याचा इशारा स्टूडंट्स राईट्स असोसिएशनने आयोगाला (Students Rights Association) दिला आहे.
असोसिएशनचे महेश बडे (Mahesh Bade) व किरण निंभोरे (Kiran Nimbhore) यांनी आयोगाच्या सचिवांना पत्र पाठवून निकाल जाहीर करण्याची मागणी केली आहे. राज्यसेवा मुख्य परीक्षा-२०२२, संयुक्त पूर्व परीक्षा गट-ब आणि क - २०२३ व राज्यसेवा पूर्व परीक्षा २०२३ यांचे निकाल मागील काही महिन्यांपासून रखडलेले आहेत. निकाल कधी घोषित केले जाणार आहेत, या प्रतिक्षेत हजारो युवक आहेत.
पेपरफुटीवर कायद्यासह विविध मागण्यांसाठी बच्चू कडू यांचे थेट मुख्यमंत्र्यांना साकडे
उमेदवारांना पुढील परीक्षांचे नियोजन देखील करायचे आहे. तसेच उमेदवारांचा आर्थिक नुकसान देखील होत आहे. त्यामुळे याबाबत लवकरात लवकर तीनही निकाल घोषित करावेत, अशी विनंती असोसिएशनने पत्राद्वारे केली आहे. निकाल प्रसिद्ध करण्यास विलंब होत असल्याने उमेदवारांचे प्रचंड नुकसान होत आहे. त्यामुळे आम्ही सर्व जण पुण्यात मोठे आंदोलन उभे करणार असल्याचेही असोसिएशनने स्पष्ट केले आहे.
निकालात विलंब होणे याचा नाहक त्रास उमेदवार आणि पालक यांना होत आहे. त्यामुळे आम्ही आंदोलनाच्या माध्यमातून हा विषय लवकर मार्गी लावावा यासाठी प्रयत्न करण्याच्या विचारात आहे. त्यामुळे याबाबत सकारात्मक निर्णय घेऊन ३ ते ४ दिवसात रखडलेले तीनही निकाल प्रसिद्ध करावेत, असे पत्रात नमूद करण्यात आले आहे.
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
