लाच प्रकरणी मुख्याध्यापिका ACB च्या जाळात; पोलिसांनी घेतले दोघांना ताब्यात

एज्युवार्ता न्यूज नेटवर्क 

सेवा प्रगती योजने (Service Progression Scheme) अंतर्गत आश्वासित प्रगती योजनेच्या थकीत लाभाचे बिल काढून देण्यासाठी लाच मागितल्याप्रकरणी गोंदिया जिल्ह्याच्या सालेकसा (Salekasa in Gondia district) तालुक्या अंतर्गत येणाऱ्या साखरीटोला गावातील श्री विद्या गर्ल्स हायस्कूल (Shri Vidya Girls High School Sakharitola) येथील मुख्याध्यापिका व शाळेतील परिचर यांना लाचलुचपत प्रतिबंधक विभागाने (Anti-Corruption Department) लाच घेताना रंगेहाथ पकडले.Caught red-handed while accepting a bribe)या घटनेमुळे शिक्षण क्षेत्रात मोठी खळबळ उडाली आहे. 

प्रकरणात तक्रारदार हे सन १ जून १९९७ पासून सदर शाळेत परिचर म्हणून कार्यरत आहेत. त्यांना १ जानेवारी २०२४ पासून सेवा अंतर्गत आश्वासित प्रगती योजनेचा लाभ मंजूर झाला होता. प्रत्यक्षात हा लाभ मे २०२५ पासून पगारात लागू झाला. मात्र जानेवारी २०२४ ते एप्रिल २०२५ या १६ महिन्यांच्या फरकाची थकीत रक्कम मिळवण्यासाठी मुख्याध्यापिका अजया जागेश्वर चूटे यांनी लाच मागितल्याचा आरोप आहे. यातील काही पैसे देवराज अनंतराम चिंधालोरे यांच्यामार्फत स्वीकारण्यात आले होते, तर उर्वरित पैसे हे पगार झाल्यावर देण्यास सांगण्यात आले होते. मात्र, या प्रकरणी तक्रारदारांनी लाचलुचपत प्रतिबंधक विभाग गोंदिया येथे तक्रार दाखल केली. तक्रारीच्या आधारे दोन पंचांसमक्ष पडताळणी करण्यात आली असता लाच मागणी झाल्याचे निष्पन्न झाले. 

लाच घेणारी मुख्याध्यापिका निलंबित; फरकाच्या बिलासाठी घेतले पैसे

आरोपी देवराज चिंधालोरे यांनी आरोपी मुख्याध्यापिका अजया चूटे यांच्या सांगण्यावरून लाच स्वीकारल्याचे सापळा कारवाईत निष्पन्न झाले.या कारवाईत दोन्ही आरोपींनी आपल्या पदाचा गैरवापर करून आर्थिक लाभ घेतल्याचे स्पष्ट झाले. कारवाईमध्ये आरोपी अजया जागेश्वर चूटे यांच्या ताब्यातून लाच रक्कम जप्त करण्यात आली. तसेच आरोपी श्रीमती अजया जागेश्वर चूटे यांच्या कडून विवो कंपनीचा मोबाईल व आरोपी देवराज अनंतराम चिंधालोरे कडून सॅमसंग कंपनीचा मोबाईल जप्त करण्यात आला आहे.

आरोपींच्या घरझडतीची प्रक्रिया सुरू आहे. या प्रकरणी पोलीस ठाणे सालेकसा येथे भ्रष्टाचार प्रतिबंध अधिनियम कलम ७ व १२ अंतर्गत गुन्हा दाखल करण्याची प्रक्रिया सुरू असून, आरोपींना ताब्यात घेण्यात आले आहे.