उद्योजक विद्यार्थ्यांच्या भेटीला; कॉलेजमध्ये येऊन साधणार संवाद 

एज्युवार्ता न्यूज नेटवर्क 

विविध क्षेत्रात उद्योजक म्हणून आपला ठसा उमटवून अनेकांच्या हाताला रोजगार देणाऱ्या उद्योजकांची यशोगाथा महाविद्यालयीन तरुणांना समजावी आणि या उद्योजकांकडे पाहून विद्यार्थ्यांनी प्रोत्साहन घ्यावे,या उद्देशाने सावित्रीबाई फुले पुणे विद्यापीठातर्फे(Savitribai Phule Pune University)सलग्न महाविद्यालयामध्ये ' एसपीपीयु स्टार्ट अप स्टॉक सिरीज' चे (SPPU Start Up Stock Series)आयोजन करण्यात आले आहे.त्यामुळे विद्यार्थ्यांना आपल्याच कॉलेजमध्ये नामांकित उद्योजकांशी संवाद साधण्याची संधी मिळणार आहे,विद्यापीठाच्या इनोव्हेशन इंक्युबॅशन सेंटरचे संचालक डॉ. देविदास गोल्हार(Devidas Golhar, Director, Innovation Incubation Center) यांनी याबाबत परिपत्रक प्रसिद्ध केले आहे. 
 
केंद्र व राज्य शासनाने स्टार्टअपची संख्या वाढावी या दृष्टीने विविध कार्यक्रम हाती घेतले आहेत. महाराष्ट्रात 50 हजार नवे स्टार्टअप उभे राहावे, असे उद्दिष्ट समोर ठेवण्यात आले आहे. त्यामुळेच सावित्रीबाई फुले पुणे विद्यापीठाच्या इनोव्हेशन इंक्युबॅशन सेंटरच्या माध्यमातून संलग्न महाविद्यालयांमध्ये एसपीपीयु लेक्चर सिरीज सुरू केली जाणार आहे. त्यासाठी महाविद्यालयांना अनुदान दिले जाणार आहे. प्रत्येक महाविद्यालय दोन लेक्चर सिरीज आयोजित करू शकते. 

स्टार्ट अप जर्नी, चॅलेंजेस, फंडिंग स्ट्रॅटर्जी आणि इनोवेशन या विषयांवर व उद्योजकांनी विद्यार्थ्यांना मार्गदर्शन करणे आवश्यक आहे. विद्यार्थ्यांमध्ये स्टार्टअप विषयी जागृती निर्माण व्हावी, त्यादृष्टीने विचार क्षमता विकसित व्हावी आणि अनुभवी व्यक्तींकडून मार्गदर्शन मिळावे, यासाठी हा उपक्रम राबविला जात आहे. सावित्रीबाई फुले पुणे विद्यापीठाशी संलग्न पुणे, अहिल्यानगर आणि नाशिक या तिन्ही जिल्ह्यांमधील महाविद्यालयांमध्ये स्टार्ट अप टॉक्सिन्स आयोजित करता येऊ शकते. येत्या एक फेब्रुवारी ते 28 फेब्रुवारी या कालावधीत महाविद्यालयांनी हा उपक्रम राबवावा,अशी अपेक्षा आहे.