शासनाविरोधात एल्गार; पुण्यातील महामोर्चात हजारो शिक्षकांचा आक्रोश

एज्युवार्ता न्यूज नेटवर्क 

शिक्षणाचे खासगीकारण (Privatisation of Education) थांबवा.., शाळाबाह्य कामे बंद करा.., आम्हाला शिकवू द्या..., गरिबांच्या मुलांना शिकू द्या.., या आणि अशा अनेक मागण्यांसाठी सोमवारी पुणे जिल्हा परिषद (Pune ZP) ते जिल्हाधिकारी कार्यालयादरम्यान पुणे जिल्हा प्राथमिक शिक्षक संघातर्फे आक्रोश मोर्चा काढण्यात आला. हजारो शिक्षक या मोर्चात उत्स्फूर्तपणे सहभागी झाले होते. (Teachers Protest in Pune)

राज्य शासनाकडून दत्तक शाळा योजना, शिक्षकांची कंत्राटी पध्दतीने भरती, शिक्षकांना दिली जाणारी अशैक्षणिक कामे यावरून शिक्षक वर्गात मोठा असंतोष निर्माण झाला आहे. त्याचाच निषेध करण्यासाठी आणि शासनाचे शिक्षकांच्या मागण्यांकडे लक्ष वेधण्यासाठी सोमवारी आक्रोश मोर्चा काढण्यात आला. गुणवत्तापूर्ण शिक्षणाची हमी हवी, असेल तर सर्वप्रथम शिक्षकांची अशैक्षणिक कामे बंद करावीत, २० पेक्षा कमी पटसंखेच्या शाळा बंद करू नका, अशाही  मागण्यांचे फलक घेऊन शिक्षक मोठ्या संख्येने रस्त्यावर उतरले होते.

देशभरातील शाळांमध्ये एकसमान अभ्यासक्रम? सर्वोच्च न्यायालयात याचिका, CBSE ने मांडली बाजू  

पुणे महानगरपालिका हद्दीत आलेल्या जिल्हा परिषदेच्या शाळांना शिक्षकांसह समाविष्ट करून घ्या, जिल्हा परिषदेच्या दप्तर दिरंगाईची चौकशी करावी, अशीही मागणी यावेळी करण्यात आली. या आंदोलनात शिक्षकांसह शालाबाह्य मुले-पालक यांच्यासह आसूड ओढून घेत सर्वांचे लक्ष्य वेढणारे पोतराजही सहभागी झाले होते.

वर्गात मुलांना शिकवताना, अनेक अशैक्षणिक कामे करावी लागतात. तसेच २०१२ पासून  शिक्षक भरती केली जात नाही, शिक्षण खात्यात लाख ते दीड लाख पदे भरली गेली नाहीत. कोणत्याही लाभासाठी नाही तर मुलांना शिकवण्यासाठी शिक्षकांना वेळा द्यावा, अशी आमची प्रमुख मागणी आहे. शिक्षण सोडून ७८ अशैक्षणिक कामे शिक्षकांना दिली जातात. त्यामुळे शिक्षकांना अनेक समस्यांचा सामना करावा लागत आहे, अशा प्रतिक्रिया आंदोलक शिक्षकांनी दिल्या.