मराठी विषय घेऊ न देणाऱ्या कॉलेजच्या चौकशीसाठी समिती स्थापन 

एज्युवार्ता न्यूज नेटवर्क 

विद्यार्थ्यांना मराठी विषय (Marathi subject)घेऊ न देणाऱ्या महाविद्यालयाच्या चौकशीसाठी सावित्रीबाई फुले पुणे विद्यापीठाने (Savitribai Phule Pune University) विद्यापीठाच्या मराठी अभ्यास मंडळाचे अध्यक्ष डॉ.संदीप सांगळे (Dr. Sandeep sangle) यांच्या अध्यक्षतेखाली चौकशी समिती  (inquiry committee) स्थापन केली आहे. त्यामुळे या समितीच्या माध्यमातून दिल्या जाणाऱ्या अहवालानुसार महाविद्यालयावर काय कारवाई होणार ? हे पाहणे उत्सुकतेचे ठरणार आहे.

सावित्रीबाई फुले पुणे विद्यापीठाशी संलग्न महाविद्यालयामधील विद्यार्थ्यांना मराठी विषय घेऊ दिला जात नसल्याची तक्रार काही दिवसांपूर्वी विद्यापीठाकडे प्राप्त झाले होती. पुणे जिल्ह्यातील शिक्रापूर तालुक्यातील कस्तुरी शिक्षण संस्थेच्या कला विज्ञान व वाणिज्य महाविद्यालयामध्ये विद्यार्थ्यांना मराठी विषय घेण्यापासून रोखले जात असल्याचे लेखी पत्र विद्यापीठाकडे प्राप्त झाले होते. त्यावर विद्यापीठाने चौकशी समिती स्थापन केली होती. परंतु, या समितीतील काही सदस्यांनी वैयक्तिक कारणास्तव या समितीत काम करणे शक्य नसल्याचे विद्यापीठाला कळवले. त्यामुळे विद्यापीठाने नवीन समिती स्थापन केली आहे.

मराठी अभ्यास मंडळाचे अध्यक्ष संदीप सांगळे यांच्या अध्यक्षतेखाली विद्यापीठाने नवीन समिती स्थापन केली आहे. या समितीमध्ये विद्यापीठाच्या आंतरविद्याशाखीय अभ्यास विद्याशाखेचे प्रभारी अधिष्ठाता डॉ.प्रभाकर देसाई, विद्यापीठाच्या मराठी विभागाचे प्रमुख डॉ.तुकाराम रोंगटे, वाघोली बकोरी फाटा येथील भारतीय जैन संघटनेच्या कला, विज्ञान व वाणिज्य महाविद्यालयातील डॉ.रमेश गायकवाड, तसेच अहमदनगर जिल्ह्यातील अहमदनगर महाविद्यालयातील डॉ.सुधाकर शेलार यांचा या समितीमध्ये समावेश करण्यात आला आहे. 

कस्तुरी शिक्षण संस्थेच्या कला विज्ञान व वाणिज्य महाविद्यालयांमधील मराठी विभागातील सहाय्यक प्राध्यापक डॉ.प्रतिभा घाग यांना विषयाचा कार्यभार कमी झाल्याचे सांगून कोणतीही पूर्व सूचना न देता सेवेतून बडतर्फ केलेले दिसून येत आहे. तसेच रेश्मा लाड व इतर विद्यार्थ्यांनी महाविद्यालय मराठी विषय जाणवपूर्वक घेऊ देत नसल्याबाबत तक्रार केली आहे. याबाबतची सत्यता तपासण्यासाठी विद्यापीठातर्फे समिती स्थापन करण्यात आली आहे. समितीच्या अध्यक्षांनी प्रत्यक्ष महाविद्यालयास भेट देऊन वस्तूनिष्ठ अहवाल विद्यापीठाला त्वरित सादर करावा, असे पत्र विद्यापीठातर्फे काढण्यात आले आहे.

-----------

विद्यापीठाकडे प्राप्त झालेल्या तक्रारीनुसार कस्तुरी शिक्षण संस्थेच्या महाविद्यालयाची चौकशी करण्यासाठी विद्यापीठातर्फे माझ्या अध्यक्षतेखाली समिती स्थापन केली आहे. समितीच्या सर्व सदस्यांशी संवाद साधून लवकरच संबंधित महाविद्यालयाला प्रत्यक्षात भेट देऊन अहवाल तयार केला जाईल.

- संदीप सांगळे, अध्यक्ष, मराठी अभ्यास मंडळ, सावित्रीबाई फुले पुणे विद्यापीठ, पुणे 

--------------

विद्यार्थ्यांना मराठी विषय घेण्यापासून रोखणाऱ्या शिरूर तालुक्यातील शिक्रापूर येथील कस्तुरी शिक्षणा संस्थेच्या महाविद्यालयाची संलग्नता रद्द करण्याची मागणी युवासेनेतर्फे विद्यापीठाचे कुलगुरू डॉ.सुरेश गोसावी यांच्याकडे करण्यात आली. त्यावर विद्यापीठाने संबंधित महाविद्यालयाची चौकशी करण्यासाठी समिती स्थापन केली. विद्यापीठाच्या मराठी विषयाच्या अभ्यास मंडळाचे अध्यक्ष डॉ.संदीप सांगळे यांच्या अध्यक्षतेखाली ही समिती स्थापन झाली आहे. त्यात इतरही काही सदस्यांचा समावेश करण्यात आला आहे. केवळ समिती स्थापन करून चालणार नाही. विद्यार्थ्यांना व महाविद्यालयातील प्राध्यापकांना न्याय मिळेपर्यंत आणि अभिजात भाषेचा अवमान करणाऱ्या संस्थेला धडा शिकवल्याशिवाय युवासेना स्वस्त बसणार नाही.

- कल्पेश यादव, सहसाचिव, युवासेना