मुंबई विद्यापीठ ; नोंदणी अर्ज भरताना विद्यार्थ्यांचे हाल

एज्युवार्ता न्यूज नेटवर्क 

मुंबई विद्यापीठाने (Mumbai University) २२९ संलग्न महाविद्यालयांची प्रथम वर्षाची प्रवेशप्रक्रिया २०२५-२६ या वर्षापासून स्थगित केल्यामुळे आधीच भांबावलेल्या विद्यार्थ्यांच्या अडचणीत आणखीन वाढ झाल्याचे दिसले. प्रथम वर्षासाठी नोंदणी अर्ज भरताना आलेल्या  अनेक अडचणींमुळे विद्यार्थ्यांमध्ये गोंधळाचे वातावरण होते. (Many difficulties encountered while filling the registration form for the first year)
विद्यापीठाने पदव्युत्तर विभाग आणि मान्यताप्राप्त शिक्षणसंस्थांत पदवी अभ्यासक्रमांच्या पहिल्या वर्षासाठी प्रवेशपूर्व ऑनलाइन नावनोंदणीची प्रक्रिया बारावी परीक्षेचे निकाल लागण्याआधीच सुरू केली होती.  बारावी निकाल जाहीर झाल्यानंतर ८ मेपासून अभ्यासक्रम निवडीची प्रक्रिया सुरू होणार होती. मात्र, त्याआधीच विद्यापीठाने  २२९ महाविद्यालयांची प्रथम वर्षाची प्रवेश प्रक्रिया २०२५-२६ या वर्षापासून स्थगित करण्याचा निर्णय घेतला. त्यानंतर ऑनलाइन प्रवेशाच्या संकेतस्थळावरून संबंधित २२९ महाविद्यालयांची नावे वगळणे, त्यांचे पर्याय वगळणे, ही प्रक्रिया सुरू झाली.

दरम्यान  विद्यार्थ्यांनी 8 मे पासून  पदवी अभ्यासक्रमासाठी त्यांच्या आधीच्याच महाविद्यालयांमध्ये प्रवेश घेण्यासाठी अभ्यासक्रमाचे पर्याय निवडण्यासाठी संकेतस्थळावर जाऊन प्रयत्न केले. मात्र, ते न झाल्याने त्यांचे महाविद्यालयांमधील प्रवेशही होऊ शकले नाहीत. बुधवारी 14 मे रोजी  सकाळी पुन्हा प्रयत्न केला असता विद्यार्थ्यांना महाविद्यालयाचा पर्याय तर उपलब्ध झाला. पण अर्जात पुढे शिक्षण मंडळाचा पर्याय निवडायचा होता. यात एकही विकल्प नसल्याने विद्यार्थ्यांचा गोंधळ उडाला. विद्यार्थ्यांनी स्वतः पर्याय भरून अर्ज  सादर करण्याचा प्रयत्न केला. पण पर्याय स्वीकारला जात नव्हता. 

याबाबत स्पष्टीकरण देताना  विद्यापीठ प्रशासनाने म्हटले की,   'यंदा बारावीचे सगळे निकाल डिजिलॉकरवर अपलोड झाले आहेत. तेथून डेटा विद्यापीठाकडे येण्यात काही समस्या आल्याने कदाचित हा प्रकार घडला असावा.' मात्र या समस्येवर तातडीने उपाय करण्यात आला असून  प्रवेश प्रक्रिया सुरळीत करण्यात आल्याचेही प्रशासनाने नमूद केले.