कोरोनानंतर मुलांची बुद्धी झाली तल्लख : ASER चा अहवाल  

एज्युवार्ता न्यूज नेटवर्क 

कोरोना काळानंतर (after Corona period) मुलांचा वाचनाचा स्तर सुधारला आहे. (Children's reading levels have improved) विशेषतः ग्रामीण भागातील मुले अधिक हुशार झाली आहेत. मुलांचे डिजिटल ज्ञान वाढले आहे. 14 ते 16 या वयोगटातील 82 टक्के मुलांना स्मार्ट फोन वापरता येतो, असा निष्कर्ष वार्षिक शिक्षण स्थिती अहवालातून ( Annual Status of  Education Report) अर्थात ASER मधून काढण्यात आला आहे.

ASER अहवाल २०२४ नुसार, 'सरकारी शाळांमधील इयत्ता ५ वी च्या मुलांचा वाचनाचा स्तर सुधारला आहे. ही पातळी आता ४४.८ टक्क्यांवर पोहोचली आहे. सरकारी शाळांमधील तिसऱ्या वर्गातील मुलांसाठी, २०२४ मध्ये मूलभूत वाचन पातळी सर्वाधिक आहे. खाजगी शाळांपेक्षा सरकारी शाळांमध्ये सुधारणा वेगाने होत आहे. गेल्या दशकातील ही पातळी सर्वाधिक आहे.'

ASER वाचन चाचणीमध्ये मुलांना पहिल्या इयत्तेच्या स्तरावर अक्षरे वाचता येतात. शब्द वाचता येतात, एक छोटा परिच्छेद वाचता येतो की दुसऱ्या इयत्तेच्या स्तरावर कथा वाचता येते या आधारावर त्यांचे मूल्यांकन केले जाते. २०२२ मध्ये सर्व राज्यांमधील सरकारी शाळांमध्ये तिसरीच्या इयत्तेच्या मुलांचे वाचनाचे प्रमाण कमी झाले होते. परंतु २०२४ पर्यंत सर्व राज्यांमध्ये ही पातळी पुन्हा सुधारली आहे. 

  ASER च्या निष्कर्षांवरून कोविडनंतर १४-१६ वयोगटातील किशोरवयीन मुलांमध्ये डिजिटल साक्षरता आणि स्मार्टफोन वापरात लक्षणीय सुधारणा दिसून आली आहे.  १४-१६ वयोगटातील सुमारे ८२.२ टक्के किशोरवईन मुलांना  स्मार्टफोन कसा वापरायचा हे माहित आहे, मात्र, ५७ टक्के त्यांच्या डिव्हाइसवर शैक्षणिक उपक्रमांमध्ये  सहभागी होतात. तर ७६ टक्के मुले सोशल मीडियासाठी त्याचा वापर केला. 
देशव्यापी घरगुती सर्वेक्षणात प्रथमच ASER मध्ये डिजिटल साक्षरतेवरील एक विभाग समाविष्ट केला गेला होता. ज्यामध्ये  १४-१६ वयोगटातील मुलांचे सर्वेक्षण करण्यात आले होते.त्यात स्मार्टफोनची एंट्री, ओनरशीप आणि वापर याबद्दल स्वतःहून नोंदवलेले प्रश्न तसेच काही मूलभूत डिजिटल कौशल्यांचे एक-एक मूल्यांकन समाविष्ट होते.