विद्यापीठांना 'या' संस्थेचे प्रवेश बंद करण्याचे आदेश ;गुन्हे दाखल करण्याची हसन मुश्रीफांची विधानसभेत घोषणा  

एज्युवार्ता न्यूज नेटवर्क 

जामनेर येथील जैन बहुउद्देशीय संस्थेअंतर्गत (Jain Multipurpose Organization)विविध महाविद्यालये विनापरवानगी व अनधिकृतपणे सुरू असणे ही गंभीर बाब असून यासंबंधी वैद्यकीय शिक्षण आयुक्त, वैद्यकीय संचालक, यांना तात्काळ चौकशीचे निर्देश देण्यात आले आहे.तसेच या संस्थेच्या विविध महाविद्यालयातील प्रवेश प्रक्रिया बंद करण्यात आली असून त्याबाबत विद्यापीठांना देखील निर्देश देण्यात येतील. येत्या आठवडाभरात संस्थेची चौकशी करून योग्य कार्यवाही केली जाईल. तसेच संस्थेने नियमबाह्य कागदपत्रे बनवले असल्यास त्यांच्यावर फौजदारी गुन्हा दाखल करून गरज पडल्यास मोक्काप्रमाणे कारवाई करण्याचे देखील प्रस्तावित करण्यात येईल, अशी घोषणा राज्याचे वैद्यकीय शिक्षण मंत्री हसन मुश्रीफ (Minister of Medical Education Hassan Mushrif)यांनी गुरूवारी विधानसभेत केली.

जामनेर येथील जैन बहुउद्देशीय संस्थेअंतर्गत अनेक वर्षापासून विविध शैक्षणिक संकुल उभारून शाळा, बीएड कॉलेज ,फार्मसी कॉलेज, ज्युनिअर कॉलेज , नर्सिंग कॉलेज  सुरू आहेत. मात्र, या संस्थेच्या बेकायदेशीर कारभाराविषयी आमदार विजय शिवतारे यांनी गुरूवारी विधानसभेत माहिती दिली. यावेळी आमदार अनुप अग्रवाल, आमदार मंगेश चव्हाण, आमदार अमोल जावळे, यांनीही शासनाचे बनावट कागदपत्र तयार करणे एक प्रकारे देशद्रोह असल्याने या संस्थाविरुद्ध देशद्रोहाचा खटला दाखल करावा,अशी मागणी केली. 

या संस्थेने बांधकाम परवानगी न घेता बांधकाम  केले आहे. तसेच शासनाच्या विविध विभागाचा देखील परवाना घेतलेला नाही. बनावट परवानग्या घेतल्या आहेत तर काही शासनाचे बनावट कागदपत्र तयार केले आहेत. अनेक दाखले बनावट असून याद्वारे शासनाची दिशाभूल करण्यात आली आहे, असा मुद्दा आमदार शिवतारे यांनी यावेळी उपस्थित करून सभागृहाचे लक्ष वेधून घेतले.

आदिवासी समाजाचे विद्यार्थ्यांचे देखील विद्यार्थी संख्या जादाचे दाखवून तिथे आदिवासी विद्यार्थ्यांचे अनुदान लाटण्याचा प्रयत्न झाला आहे, यासंबंधी संस्थेची तात्काळ मान्यता रद्द करून शासनाचे  घेतले अनुदान वसूल करण्यात यावे, संस्थेच्या मालमत्ता देखील जप्त करण्यात याव्यात, अशीही मागणी यावेळी आमदारांनी केली. तसेच
शासनाच्या विविध विभागांचा या संस्थेच्या कारभारशी संबंध येत असल्याने त्या त्या विभागाशी निगडित विषय त्या त्या विभागांना सांगून तातडीने कारवाई करणार असल्याचेही यावेळी मंत्री हसन मुश्रीफ यांनी सांगितले.

शासनाची खोट्या कागदपत्रांच्या आधारे दिशाभूल करणे ही अत्यंत गंभीर बाब असल्याने शासन या प्रकरणी कोणचीही गय करणार नाही. कठोरात कठोर कार्यवाई करण्यात येईल, असेही शेवटी मंत्री हसन मुश्रीफ यांनी  सांगितले. सदर संस्थेने महसूल विभागाचा देखील कर बुडविला आहे ही बाब उघड झाल्याने आजच या संस्थेवर फौजदारी गुन्हे दाखल करावे, अशीही मागणी आमदारांनी लावून धरली.त्यावर यासंबंधी शालेय शिक्षण, वैद्यकीय शिक्षण, महसूल विभाग, विद्यापीठ, आरोग्य विद्यापीठ यांच्याकडून माहिती घेऊन तातडीने कारवाई करण्यात येईल,असे हसन मुश्रीफ यांनी स्पष्ट केले.
----------------------------------