TET सक्तीविरोधात हजारोंच्या संख्येने मोर्चा; पुनर्विचार याचिका दाखल करण्याची मागणी

एज्युवार्ता न्यूज नेटवर्क  

सर्वोच्च न्यायालयाच्या टीईटी सक्तीच्या निर्णयाविरोधात (Against the decision to make TET compulsory) महाराष्ट्र शासनाने पुनर्विचार याचिका दाखल करणे गरजेचे होते.परंतु, महाराष्ट्र शासनाने अद्याप ही याचिका दाखल केली नाही. त्यामुळे कोल्हापूर जिल्हा शैक्षणिक व्यासपीठाच्या (Kolhapur District Educational Platform) वतीने शनिवारी कोल्हापूर जिल्हाधिकारी कार्यालयासमोर (Kolhapur District Collectors Office)मूक मोर्चा काढण्यात आला. आमदार जयंत आजगावकर यांच्या मार्गदर्शनाखाली काढण्यात आलेल्या मोर्चात हजारोंच्या संख्येने शिक्षक सहभागी झाले. येत्या 24 नोव्हेंबर पर्यंत याचिका दाखल केली नाही तर शाळा बंद आंदोलन केले जाईल,असा इशाराही यावेळी देण्यात आला.

शिक्षक संघटनांनी 4 ऑक्टोबर रोजी टीईटी सक्ती विरोधात मोर्चा आयोजित केला होता. परंतु, राज्याचे शालेय शिक्षण मंत्री दादा भुसे यांनी 1 ऑक्टोबर रोजी 16 ऑक्टोबरपर्यंत  पुनर्विचार याचिका दाखल करण्याचे आश्वासन दिले होते. त्यामुळे हा मोर्चा स्थगित करण्यात आला होता. शालेय शिक्षण मंत्री यांनी आश्वासन न पाळल्यामुळे कोल्हापूर येथील जिल्हाधिकारी कार्यालयासमोर मोठ्या संख्येने शिक्षक एकत्र झाले. यावेळी आमदार आजगावकर यांनी उपस्थितांना संबोधित केले. 

आसगावकर म्हणाले, मोर्चात मोठ्या संख्येने महिला सहभागी झाल्या आहेत. राज्य शासनाकडून लाडकी बहीण योजना राबवली जाते. या शिक्षक महिला शासनाच्या लाडक्या बहिणी नाहीत का ? टीईटी सक्तीमुळे यांची नोकरी जाऊ शकते. त्यामुळे राज्य शासनाने तात्काळ पुनर्विचार याचिका दाखल करावी. शासनाने याचिका दाखल केली नाही तर मराठी शाळा वाचणार नाहीत. अनेक शिक्षकांच्या नोकरीवर गदा येईल. मराठी शाळा शिक्षकांअभावी बंद पडतील. सरकारी शाळा वाचवण्यासाठी शासनाने याचिका दाखल करावी.

कोल्हापूर जिल्ह्यातील विविध शाळांमधील शिक्षक टीईटी सक्ती विरोधातील आंदोलनामध्ये मोठ्या संख्येने सहभागी झाले होते.शिक्षक एकजुटीचा विजय असो, कोल्हापूर जिल्हा शैक्षणिक व्यासपीठाचा विजय असो, अशा घोषणा देत शिक्षकांनी पुनर्विचार याचिका दाखल करण्याची मागणी केली.