TET परीक्षेचे हॉल तिकीट मिळणार सोमवारपासून; परीक्षेमुळे निवडणूक प्रशिक्षण नाही..

एज्युवार्ता न्यूज नेटवर्क 

राज्यातील सेवेत कार्यरत असणाऱ्या सर्वच शिक्षकांना टीईटी परीक्षेची सक्ती करण्यात आली आहे. सर्वोच्च न्यायालयाच्या निर्णयानुसार आता सेवेत असणाऱ्या शिक्षकांना दोन वर्षाच्या आत टीईटी परीक्षा उत्तीर्ण व्हावी लागणार आहे.अन्यथा त्यांना नोकरी गमवावी लागणार आहे. त्यामुळे टीईटी परीक्षेसाठी अर्ज करणाऱ्या उमेदवारांची संख्या गेल्या वर्षाच्या तुलनेत एक लाख 21 हजाराने वाढली आहे. परीक्षा अर्ज भरलेल्या उमेदवारांना येत्या 10 नोव्हेंबर पासून हॉल तिकीट उपलब्ध होणार आहे.तसेच टीईटी परीक्षा असल्यामुळे निवडणूक प्रशिक्षण आयोजित करू नये,असे पत्र परीक्षा परिषदेने जिल्हाधिकारी यांना पाठवले आहे. 

महाराष्ट्र राज्य परीक्षा परिषदेच्या माध्यमातून महाराष्ट्र शिक्षक पात्रता परीक्षा अर्थात टीईटी परीक्षा घेतली जाते. येत्या 23 नोव्हेंबर रोजी राज्यभरातील विविध परीक्षा केंद्रांवर ही परीक्षा आयोजित केली जाणार आहे. मागील वर्षी परीक्षेसाठी नोंदणी केलेल्या उमेदवारांची संख्या तीन लाख 53 हजार 952 एवढी होती. तर 1 हजार 23 परीक्षा केंद्रांवर ही परीक्षा घेण्यात आली होती. सर्वोच्च न्यायालयाने टीईटी परीक्षेची सक्ती केल्यामुळे यंदा टीईटी परीक्षेसाठी अर्ज करणाऱ्या उमेदवारांच्या संख्येत मोठी वाढ झाली आहे. टीईटी परीक्षेसाठी यंदा चार लाख 75 हजार 668 उमेदवारांनी अर्ज केले आहेत. या उमेदवारांची परीक्षा 1 हजार 420 परीक्षा केंद्रांवर घेतली जाणार आहे.

निवडणूक प्रशिक्षण आयोजित न करणे बाबत....

नुकत्याच नगरपरिषदा व नगरपंचायतच्या सार्वत्रिक निवडणुका जाहीर करण्यात आल्या आहेत. त्यामुळे निवडणुकांसाठी जिल्हाधिकारी कार्यालयाच्या माध्यमातून निवडणुकीबाबत प्रशिक्षण आयोजित केले जाऊ शकते. त्यामुळे राज्य परीक्षा परिषदेच्या माध्यमातून सर्व जिल्हाधिकारी यांना पत्र पाठविण्यात आले आहे. 23 नोव्हेंबर रोजी शिक्षक पात्रता परीक्षा आयोजित करण्यात आली आहे. या परीक्षेत राज्यभरातून 4 लाख 75 हजार 668 उमेदवार परीक्षेत प्रविष्ट झाले आहेत.त्यातील किमान दीड ते दोन लाख शिक्षक सध्या सेवेत कार्यरत असून ते परीक्षेस प्रविष्ट होणार आहेत. त्यामुळे 22 व 23 नोव्हेंबर रोजी शिक्षक व अधिकारी यांच्यासाठी निवडणूक प्रशिक्षण आयोजित करू नये. मागील वर्षी देखील सार्वत्रिक विधानसभा निवडणुकीच्या प्रक्रिये दरम्यान 10 नोव्हेंबर रोजी शिक्षक पात्रता परीक्षा घेण्यात आली होती.  त्यावेळी देखील शिक्षक पात्रता परीक्षेच्या नियोजनाच्या अनुषंगाने 10 नोव्हेंबर रोजीचे निवडणूक प्रशिक्षण शिक्षक पात्रता परीक्षेमध्ये कर्तव्य बजावणाऱ्या अधिकारी कर्मचाऱ्यांसाठी पुढील दिवसांमध्ये वेगवेगळ्या वेळी घेण्यात आले होते.