आता शिक्षण सेवक पदावर पुन्हा काम करण्याची गरज नाही

एज्युवार्ता न्यूज नेटवर्क 
शिक्षक व शिक्षकेतर कर्मचारी यांच्यासाठी महत्वाची बातमी आहे. नियमित शासकीय सवेतील अथवा ज्याचे वेतन अनुदान शासनामार्फत अथवा स्थानिक स्वराज्य संस्थांमार्फत अदा केले जाते, अशा नियमित, निमशासकीय सेवेतील व्यक्ती ज्यावेळी राज्यातील स्थानिक स्वराज्य संस्थांच्या शाळा तसेच या विभागाच्या अधिपत्याखालील १०० टक्के अनुदानित शाळांमधील कोणत्याही स्तरातील व कोणत्याही माध्यमातील शिक्षण सेवक पदावर विहीत पध्दतीने नियुक्त होतो, त्यावेळी त्याची आहे तिच वेतननिश्चिती करण्यास शासनाने मान्यता दिली आहे. शिक्षकेतर कर्मचारी यांना पात्रता पूर्ण केल्यावर शिक्षक पदावर नियुक्ती हवी असल्यास त्यांना पुन्हा शिक्षण सेवकांचा कालावधी पूर्ण करावा लागणार नाही.त्यामुळे या निर्णयाचा अनेकांना फायदा होणार आहे. खाजगी शाळा ज्यात प्राथमिक/उच्च प्राथमिक/माध्यमिक/उच्च माध्यमिक शाळा तसेच अध्यापक विद्यालये/शासकीय विद्यानिकेतने व सैनिकी शाळा या पैकी कोणत्याही शाळेत कर्मचारी सेवक असल्यास त्यांना या निर्णयाचा लाभ मिळणार आहे.

शासन निर्णयाप्रमाणे अशा कर्मचाऱ्याची पूर्वीची नियुक्ती नियमित स्वरुपाची व वैध मार्गाने झालेली असावी, म्हणजेच त्या कर्मचाऱ्याची पूर्वीची नियुक्ती त्या पदासाठी विहीत करण्यात आलेल्या सेवाप्रवेश नियमांच्या तरतूदींची पूर्तता करुन सक्षम नियुक्ती प्राधिकाऱ्यामार्फत झालेली असावी.अशा कर्मचाऱ्यांनी पूर्वीच्या पदावरील सेवेचे स्थायित्व लाभ प्रमाणपत्र धारण केले असणे किंवा शासकीय सेवकास त्याने धारण केलेल्या पदावर स्थायित्व लाभ प्रमाणपत्र प्राप्त करण्यासाठी ज्या अटी व शर्तीची पूर्तता करणे आवश्यक आहे त्या सर्व अटी व शर्तीची पूर्तता अशा कर्मचाऱ्यांनी पूर्वीच्या पदावर केलेली असणे आवश्यक राहील.संबंधित कर्मचाऱ्याने नवीन पदासाठी केलेला अर्ज संबंधित कार्यालयाच्या सक्षम प्राधिकाऱ्याच्या/कार्यप्रमुखाच्या पूर्वपरवानगीने केलेला असावा.

पूर्वीची नियुक्ती व नवीन नियुक्ती यामध्ये बदलीच्या नियमानुसार अनुज्ञेय असलेल्या पदग्रहण अवधीहून अधिक खंड असू नये. तसेच पूर्वीच्या पदावर आहरित केलेल्या अंतिम वेतनाचा टप्पा अनुज्ञेय असलेल्या नवीन वेतनश्रेणीत समाविष्ट नसल्यास नवीन वेतनश्रेणीच्या किमान टप्प्यावर या उमेदवारांची वेतननिश्चिती करण्यात यावी. त्याचप्रमाणे पूर्वीच्या पदावर आहरित केलेल्या अंतिम वेतनाचा टप्पा अनुज्ञेय असलेल्या नवीन वेतनश्रेणीत समाविष्ट असल्यास नवीन वेतनश्रेणीतील अशा टप्प्यावर या उमेदवारांची वेतननिश्चिती करण्यात यावी.

सद्यस्थितीत ज्या उमेदवारांचा शिक्षण सेवक कालावधी चालू आहे, अशा उमेदवारांची वेतननिश्चिती शासन निर्णयात दर्शविल्याप्रमाणे आणि या शासन निर्णयाच्या दिनांकापासून करण्यात यावी. मात्र, शिक्षण सेवक पदावरील रुजू दिनांकापासून अशी वेतननिश्चिती अनुज्ञेय असणार नाही. उपरोक्तप्रमाणे वेतननिश्चिती करण्यास मान्यता देण्यात आली असली तरी अशा उमेदवारांना एकूण ३ वर्षाचा परिविक्षाधीन कालावधी लागू राहील. शिक्षण सेवक योजनेशी संबंधित सर्व शासन निर्णयातील अन्य तरतूदी यापुढेही यथास्थिती लागू राहतील,असेही या शासन निर्णयात नमूद करण्यात आले आहे.

--------------------------------------------------------

10 जून 2005 च्या शासन निर्णयानुसार राज्यातील काही पात्र शिक्षकेतर कर्मचाऱ्यांना शिक्षक पदावर पदोन्नती घेताना शिक्षण सेवक योजना लागू करण्यात येत होती त्यामुळे अनेक शिक्षकेतर कर्मचारी न्यायालयीन मार्गाचा अवलंब करीत होते किंवा शिक्षक पदावरील पदोन्नती स्वीकारत नव्हते परंतु या शासन निर्णयामुळे त्यांच्या अंतिम वेतनाचा टप्पा किंवा नवीन वेतनश्रेणीत समाविष्ट असल्यास त्या टप्प्यावरील वेतनश्रेणी मिळणार असल्यामुळे अनेक शिक्षकेतर कर्मचारी यापुढे शिक्षक होतील व मुख्याध्यापक ही होतील त्यामुळे या शासन निर्णयाचे स्वागत करण्यात येत आहे. 
- शिवाजी खांडेकर ,सेक्रेटरी ,महाराष्ट्र राज्य माध्यमिक, शाळा शिक्षकेतर संघटनांचे महामंडळ