'असर'चा अहवाल शिक्षण विभागाला अमान्य; सर्व दावे खोडले
राज्याच्या शिक्षण विभागाला हा अहवाल रुचलेला दिसत नाही. कारण असर या संस्थेने प्रसिद्ध केलेल्या अहवालाला शिक्षण विभागाने खरमरीत उत्तर देत सर्व दावे खोडून काढले आहे.
eduvarta@gmail.com 
एज्युवार्ता न्यूज नेटवर्क
'असर' (ASER) अर्थात प्रथम एज्युकेशन फाऊंडेशन (First Education Foundation Report) या संस्थेने शाळा सर्वेक्षणाचा (ग्रामीण) अहवाल नुकताच प्रकाशित केला. यामध्ये शिक्षण विभागातील अनेक समस्यावर प्रकाश टाकण्याचे काम करण्यात आले आहे. मात्र, राज्याच्या शिक्षण विभागाला (State Education Department) हा अहवाल रुचलेला दिसत नाही. कारण असर या संस्थेने प्रसिद्ध केलेल्या अहवालाला शिक्षण विभागाने खरमरीत उत्तर देत सर्व दावे खोडून काढले आहे.
संस्थेने २०.४ टक्के विद्यार्थ्यांकडून संगणकाचा वापर होत असल्याचे अहवालामध्ये म्हटले आहे. परंतु,अहवालातील मुद्द्याचे शिक्षण विभागाने खंडण केले आहे. राज्यातील एकूण १ लाख ८ हजार १४४ शाळांचा विचार करता संगणकाचा वापर करण्याचे प्रमाण ७२.९५ टक्के इतके आहे. सदर संस्थेने ४८.३ टक्के शाळांमध्ये संगणक नसल्याचे नमूद केले आहे. वास्तविकतः एकूण शाळांपैकी ७८.४० टक्के शाळांमध्ये संगणक सुविधा उपलब्ध आहे. मुलींकरिता साधारणतः ९६.८ टक्के इतक्या शाळांमध्ये स्वच्छतागृहांची उपलब्धता असल्याची माहिती शालेय शिक्षण विभागामार्फत देण्यात आली आहे.
असर या संस्थेने ४०९ प्राथमिक व ४६३ उच्च प्राथमिक व त्यावरील अशा ग्रामीण भागातील एकूण ८७२ शाळांचे सर्वेक्षण केले आहे. युडायस (UDISE) डाटा सन २०२३-२४ अनुसार राज्यामध्ये एकूण १ लाख ८ हजार १४४ शाळा आहेत. प्रथम एज्युकेशन फाऊंडेशन या संस्थेने एकूण शाळांच्या केवळ ०.८१ टक्के इतक्या शाळांचेच सर्वेक्षण केलेले आहे. तसेच राज्यातील एकूण २ लाख ९ लाख ६१ हजार ८०० शालेय विद्यार्थ्यांपैकी केवळ ३३ हजार ७४६ मुलांचे सर्वेक्षण संस्थेने केले आहे जे की एकूण विद्यार्थ्यांच्या केवळ ०.१६ टक्के इतके आहे या आधारांवर अहवाल प्रकाशित केलेला आहे, अशी माहिती शालेय शिक्षण विभागामार्फत देण्यात आली आहे.
