ओबीसी विद्यार्थ्यांचा प्रश्न मार्गी: भोजन आणि निर्वाह भत्त्याचा निधी मंजूर , शासन निर्णय प्रसिद्ध 

एज्युवार्ता न्यूज नेटवर्क 

राज्यातील इतर मागास प्रवर्ग (ओबीसी), विमुक्त जाती, भटक्या जमाती व विशेष मागास प्रवर्गातील उच्च शिक्षण घेणाऱ्या विद्यार्थ्यांसाठी शासनाने ५४ वसतिगृहे सुरू आहेत. या वसतिगृह राहणार्‍या विद्यार्थ्यांचा प्रश्न मार्गी लागला आहे. कारण  भोजन आणि निर्वाह भत्त्यासाठी ६ कोटी ९५ लाख ४८ हजार ९०० रुपयांचा निधी शासनाकडून मंजूर (Food and subsistence allowance approved) करण्यात आला आहे. या संदर्भातील शासन निर्णय प्रसिद्ध (Government decision published) करण्यात आला आहे.

राज्यातील इतर मागास प्रवर्ग, विमुक्त जाती, भटक्या जमाती व विशेष मागास प्रवर्गातील उच्च शिक्षण घेणाऱ्या विद्यार्थ्यांसाठी प्रत्येक जिल्ह्याच्या ठिकाणी दोन याप्रमाणे ७२ वसतिगृह सुरू करण्याचा शासनाकडून निर्णय घेण्यात आला आहे. विद्यार्थी आणि विद्यार्थिनींसाठी प्रत्येकी १०० क्षमतेची ही वसतिगृहे असून, यांतील ५४ वसतिगृहे सुरू करण्यात आली आहेत. भाडेतत्त्वावरील या वसतिगृहांमध्ये जेवणाची सोय नसल्याने भोजन भत्ता म्हणून दर महिन्याला विद्यार्थ्यांना प्रत्येकी ४ हजार ५०० रुपये दिले जातात. यासोबतच विद्यार्थ्यांना ६००, तर विद्यार्थिनींना ८०० रुपयांप्रमाणे निर्वाह भत्ता दिला जातो. 

या संदर्भात शासन निर्णय काढून ६ कोटी ९५ लाख ४८ हजार २०० रुपयांची तरतूद करण्यात आली. त्यामध्ये भोजन भत्त्यासाठी ५ कोटी ७७ लाख ५३ हजार रुपये, पुरवठा व सामग्री (मुलींकरिता स्वच्छता साधने) साठी २७ लाख ५३ हजार ९०० रुपये व निर्वाह भत्ता म्हणून ९ लाख ४२ हजार रुपयांची तरतूद मंजूर करण्यात आली आहे.