ओबीसी विद्यार्थ्यांसाठी परदेशी शिक्षणाचे द्वार खुले, सरकारकडून निधी मंजूर

एज्युवार्ता न्यूज नेटवर्क 

परदेशात शिक्षण घेण्याची स्वप्ने पाहाणाऱ्या ओबीसी विद्यार्थ्यांसाठी आनंदाची बातमी आहे. नुकताच राज्य मंत्रिमंडळाच्या बैठकीत ओबीसी विद्यार्थ्यांच्या परदेशी शिष्यवृत्तीचा (Overseas Scholarships for OBC Students) मुद्दा समोर आला होता. त्या शिष्यवृत्तीला राज्य सरकारने मंजूरी दिली आहे. त्यामुळे ओबीसी समाजातील विद्यार्थ्यांना याचा फायदा होणार आहे. शैक्षणिक वर्ष 2024-25 (Academic year 2024-25) मध्ये परदेशात उच्च शिक्षण घेणाऱ्या विद्यार्थ्यांसाठी शिवष्यवृत्ती मंजूर करण्यात आली आहे. त्यामुळे राज्यातील विमुक्त जाती, भटक्या जमाती,इतर मागास वर्ग व विशेष मागास प्रवर्गातील 75 पात्र विद्यार्थ्यांना याचा लाभ होणार आहे. यासंदर्भातील नुकताच शासन निर्णय राज्य सरकारकडून प्रसिद्ध (Government decision published) करण्यात आला आहे.

मागास बहुजन कल्याण संचालनालयाचे संचालक यांच्या अध्यक्षतेखाली एक समिती स्थापन करण्यात आली आहे. या समितीने या अर्जांची छाननी केली आहे. त्यानंतर अर्जांतील त्रुटींची पूर्तता करून अभ्यासक्रमनिहाय गुणवत्ता यादी तयार केली. ही यादी 10 सप्टेंबरला राज्य सरकारला सादर केली. यानंतर इतर मागास बहुजन कल्याण विभागाचे प्रधान सचिव यांच्या अध्यक्षतेखाली गठीत समितीने 23 सप्टेंबरला झालेल्या बैठकीत पात्र 75 विद्यार्थ्यांची निवड केली आहे. या शिष्यवृत्तीचा लाभ मिळविणाऱ्या विद्यार्थ्यांना त्यांच्या शिक्षणाचा फायदा देशसेवेसाठी करून देणे आवश्यक राहणार आहे. तशा आशयाचे हमीपत्र लिहून द्यावे लागणार आहे. या योजनेमुळे अनेक विद्यार्थ्यांचे परदेशात शिक्षण घेण्याचे स्वप्नही पूर्ण होणार आहे.

राज्यातील विमुक्त जाती भटक्या जमाती, इतर मागास वर्ग व विशेष मागास प्रवर्गातील गुणवंत विद्यार्थ्यांसाठी परदेशात उच्च शिक्षणासाठी परदेश शिष्यवृत्ती योजना 2019-20 पासून लागू करण्यात आली आहे. या योजनेंतर्गत सामाजिक न्याय व विशेष सहाय्य विभागाच्या 30 ऑक्टोबर 2023 च्या शासन निर्णयानुसार विद्यार्थ्यांची संख्या 75 इतकी अंतिम करण्यात आली. त्यानुसार 2024-25 या वर्षाकरिता परदेशात उच्च शिक्षणासाठी शिष्यवृत्ती योजनेंतर्गत सुरुवातीला अर्ज मागविण्यात आलेले पात्र उमेदवारांची निवड करण्यात आली आहे.