CET Cell : वैद्यकीय पदव्युत्तर अभ्यासक्रमाच्या प्रवेश नोंदणीचे वेळापत्रक जाहीर

एज्युवार्ता न्यूज नेटवर्क 

राज्य सामाईक प्रवेश परीक्षा (State Common Entrance Test) कक्षातर्फे शैक्षणिक वर्ष २०२४-२५ (Academic year 2024-25) साठी राज्य कोट्याअंतर्गत होणाऱ्या वैद्यकीय पदव्युत्तर अभ्यासक्रमाच्या प्रवेश नोंदणीचे वेळापत्रक प्रसिद्ध (Medical Post Graduate Course Admission Registration Schedule Released) करण्यात आले आहे. राज्यातील शासकीय, महानगरपालिका, खाजगी विनाअनुदानित, तसेच अल्पसंख्याक वैद्यकीय महाविद्यालयात प्रवेश घेण्यासाठी इच्छुक असलेल्या विद्यार्थ्यांना २ ऑक्टोबरपर्यंत ऑनलाईन नोंदणी अर्ज भरता येणार आहे. 

अर्ज नोंदणी केल्यानंतर विद्यार्थ्यांना ३ ऑक्टोबरपर्यंत रात्री ११ वाजून ५९ मिनिटांपर्यंत ऑनलाईन पद्धतीने नोंदणी शुल्क व अनामत रक्कम म्हणून तीन हजार रुपये भरणे आवश्यक आहे. हे नोंदणी शुल्क भरल्याशिवाय विद्यार्थ्यांचा अर्ज ग्राह्य धरला जाणार नाही. नोंदणी शुल्क भरल्यानंतरच विद्यार्थ्यांना त्यांच्या कागदपत्रांची रंगीत प्रत ऑनलाईन पद्धतीने संकेतस्थळावर अपलोड करता येणार आहे. विद्यार्थ्यांना ३ ऑक्टोबर रोजी रात्री ११ वाजून ५९ मिनिटांपर्यंत ऑनलाईन पद्धतीने स्कॅन कागदपत्रे अपलोड करता येणार आहेत.

यशस्वीरित्या अर्ज नोंदणी, नोंदणी शुल्क व अनामत रक्कम आणि कागदपत्रे ऑनलाईन पद्धतीने अपलोड केल्यानंतर राज्य कोट्यासाठी पात्र ठरणाऱ्या विद्यार्थ्यांची तात्पुरती गुणवत्ता यादी जाहीर केली जाणार आहे. राज्य कोटा प्रवेशासाठी विद्यार्थ्यांनी दिलेल्या वेळेत अर्ज नोंदणी करणे आवश्यक आहे. या कालावधीत अर्ज नोंदणी न करणारे विद्यार्थी राज्य कोट्यातील प्रवेशासाठी पात्र ठरणार नसल्याचे राज्य सामाईक प्रवेश परीक्षा कक्षाकडून जाहीर करण्यात आले आहे.

एमबीबीएसचे शिक्षण पूर्ण केल्यानंतर ‘डॉक्टर ऑफ मेडिसिन’ आणि ‘मास्टर ऑफ सर्जरी’हे पदव्युत्तर शिक्षण घेण्यासाठी विद्यार्थी इच्छुक असतात. त्यानुसार नीट पीजी परीक्षा दिलेल्या विद्यार्थ्यांना राज्य कोट्यातून प्रवेश घेता येतो. त्यासाठी राज्य सामाईक प्रवेश परीक्षा कक्षाने अर्ज नोंदणीचे वेळापत्रक जाहीर केले आहे. इच्छुक उमेदवारांना राज्य सामाईक प्रवेश परीक्षा कक्षाच्या http://www.mahacet.org या संकेतस्थळावर विद्यार्थ्यांना २ ऑक्टोबर रोजी रात्री ११ वाजून ५९ मिनिटांपर्यंत ऑनलाईन नोंदणी करता येणार आहे.