पालकांसाठी खुशखबर ; NCERT च्या पुस्तकांच्या किमतीत घट...
देशातील विद्यार्थ्यांना, विशेषत: जे विद्यार्थी पुढील सत्रापासून इयत्ता 9-12 मध्ये जाणार आहेत, त्यांचा थेट फायदा होईल,अशी योजना आखण्यात आली आहे.
eduvarta@gmail.com 
एज्युवार्ता न्यूज नेटवर्क
पुढच्या शैक्षणिक वर्षाच्या अनुषंगाने पालकांसाठी एक दिलासादायक माहिती समोर आली आहे. नॅशनल कौन्सिल ऑफ एज्युकेशनल रिसर्च अँड ट्रेनिंग (National Council of Educational Research and Training) NCERT ने 9 वी ते 12वी पर्यंतच्या पुस्तकांच्या किमती 20% ने कमी केल्या आहेत. (Prices of books have been reduced by 20%.) NCERT पुस्तकांवर एवढी सूट देण्याची ही पहिलीच वेळ आहे. NCERT ने लवकरच सुरू होणाऱ्या सत्रासाठी 9 वी ते 12वी पर्यंतच्या पुस्तकांच्या किमती 20 टक्क्यांनी कमी करण्याची घोषणा केली आहे.
एनसीईआरटीचे संचालक दिनेश प्रसाद सकलानी यांनी NCERT च्या मुख्यालयात सभागृहाच्या विकासाच्या भूमिपूजन समारंभात ही माहिती दिली. संचालक दिनेश प्रसाद यांच्या म्हणण्यानुसार, एनसीईआरटीच्या पुस्तकांमध्ये अशी सूट देण्याची ही पहिलीच वेळ आहे. कमी वेळेत जास्त पुस्तके छापता यावीत म्हणून यंदा एनसीईआरटीने कागद खरेदी वाढवली असून नवीन प्रिंटिंग मशीनचा वापर केला आहे. देशातील विद्यार्थ्यांना, विशेषत: जे विद्यार्थी पुढील सत्रापासून इयत्ता 9-12 मध्ये जाणार आहेत, त्यांचा थेट फायदा होईल,अशी योजना आखण्यात आली आहे. NCERT दरवर्षी सुमारे 300 विषयांची सुमारे 4 ते 5 कोटी पाठ्यपुस्तके प्रकाशित करते.
याशिवाय पुस्तकांची पोहोच वाढावी,या उद्देशाने NCERT ने फ्लिपकार्ट सोबत देखील सामंजस्य करार केला आहे. विशेष म्हणजे काही नुकतेच NCERT ने अमेझोन या ऑनलाइन शॉपिंग प्लॅटफॉर्म सोबतही सामंजस्य करार केला होता.
