‘अमृत मानस मित्र’ प्रशिक्षणाद्वारे मानसिक आरोग्य क्षेत्रात करिअरची सुवर्णसंधी

एज्युवार्ता न्यूज नेटवर्क

महाराष्ट्र शासनाच्या महाराष्ट्र संशोधन उन्नती व प्रशिक्षण प्रबोधिनी अर्थात अमृत या स्वायत्त संस्थेतर्फे विद्यार्थ्यांचे मानसिक आरोग्य, भावनिक सक्षमीकरण आणि समुपदेशन सेवा अधिक प्रभावी करण्याच्या उद्देशाने  ‘अमृत मानस मित्र’ समुपदेशक प्रशिक्षण कार्यक्रम सुरू करण्यात आला आहे. या उपक्रमासाठी महाराष्ट्र शासनाची मानसिक आरोग्य क्षेत्रातील पुण्यातील अग्रगण्य संस्था महाराष्ट्र मानसिक आरोग्य संस्था (MIMH) ही तांत्रिक व शैक्षणिक सहकार्य करणार आहे.या प्रशिक्षणासाठी एम.ए./एम.एस्सी. मानसशास्त्र, एम.ए./एम.एस्सी. समुपदेशन मानसशास्त्र किंवा मास्टर ऑफ सोशल वर्क (MSW) ही पदव्युत्तर पदवी असलेले पात्र उमेदवार अर्ज करू शकतात. या क्षेत्रातील पूर्वानुभव असलेल्या उमेदवारांना प्राधान्य दिले जाणार आहे.पहिल्या बॅचसाठी अर्ज करण्याची अंतिम मुदत २९ जून २०२६ आहे.

मानसिक आरोग्य, विद्यार्थी समुपदेशन, भावनिक आधार, संवाद कौशल्ये, सक्रिय ऐकणे (Active Listening), सहानुभूतीपूर्ण प्रतिसाद, संकट व्यवस्थापन, जीवनकौशल्ये आणि मानससामाजिक सहाय्य यांसारख्या महत्त्वाच्या विषयांवर आधारित हा अभ्यासक्रम असून सहभागी उमेदवारांना प्रत्यक्ष कार्यक्षम समुपदेशक म्हणून घडविण्यावर भर देण्यात आला आहे.

या प्रशिक्षणाचे प्रमुख वैशिष्ट्य म्हणजे १५ दिवसांचे ऑफलाइन प्रशिक्षण, अधिकृत प्रमाणपत्र, फील्ड प्लेसमेंट आणि रोजगारक्षम कौशल्य विकासाची संधी. प्रशिक्षण यशस्वीरित्या पूर्ण करणाऱ्या उमेदवारांना अमृत आणि महाराष्ट्र मानसिक आरोग्य संस्थेचे संयुक्त अधिकृत प्रमाणपत्र देण्यात येणार आहे.

प्रशिक्षणाचा पहिला टप्पा पुणे येथे १५ दिवसांचा ऑफलाइन असेल. यामध्ये इंटरॅक्टिव्ह सत्रे, केस स्टडीज, प्रात्यक्षिक उपक्रम आणि तज्ज्ञांचे मार्गदर्शन दिले जाईल. त्यानंतर एका महिन्याचा फील्ड एक्सपोजर कालावधी असेल, ज्यामध्ये सहभागी उमेदवारांना जिल्हास्तरावरील शाळा किंवा महाविद्यालयांशी जोडले जाईल. पुढील तीन ते पाच महिन्यांत MIMH मार्फत ऑनलाइन सुपरव्हिजन, मेंटरिंग, नियमित मार्गदर्शन, अडचणींचे निराकरण आणि व्यावसायिक सहाय्य उपलब्ध करून दिले जाईल.

संपूर्ण प्रशिक्षण महाराष्ट्र मानसिक आरोग्य संस्था (MIMH), पुणे येथील तज्ज्ञ मार्गदर्शकांद्वारे दिले जाणार असून अमृततर्फे विविध क्षेत्रातील अनुभवी तज्ज्ञांचेही मार्गदर्शन लाभणार आहे.

प्रशिक्षणानंतर उमेदवारांना केस डिस्कशन, नियमित ऑनलाइन सुपरव्हिजन, मेंटरिंग सत्रे, व्यावसायिक मार्गदर्शन आणि कौशल्य वृद्धीसाठी सातत्यपूर्ण ‘हँड-होल्डिंग सपोर्ट’ दिला जाणार आहे. राष्ट्रीय शैक्षणिक धोरण २०२० (NEP 2020) मध्ये कौशल्याधारित शिक्षण, समाजाभिमुख प्रशिक्षण आणि रोजगारक्षमतेवर देण्यात आलेल्या भराशी हा उपक्रम सुसंगत असल्याचे अमृततर्फे सांगण्यात आले.

मानसिक आरोग्य क्षेत्रात कार्य करण्याची संधी, सामाजिक संस्थांमधील रोजगाराच्या संधी, व्यावसायिक नेटवर्किंग आणि रोजगारक्षम कौशल्यांचा विकास हे या कार्यक्रमाचे प्रमुख लाभ मानले जात आहेत.

‘अमृत मानस मित्र’ प्रशिक्षण हे अमृतच्या लक्षित गटातील उमेदवारांसाठी पूर्णपणे मोफत असले तरी निवास, भोजन आणि राहण्याची व्यवस्था उमेदवारांनी स्वतःच्या खर्चाने करावयाची आहे.

इच्छुक उमेदवारांनी अमृतच्या अधिकृत संकेतस्थळावर ऑनलाइन अर्ज करावा. अर्जांची छाननी, ओरिएंटेशन सत्र, आवश्यक परीक्षा किंवा मुलाखतीनंतर पात्र उमेदवारांची निवड करण्यात येणार आहे. अनुभव आणि ‘प्रथम येणाऱ्यास प्राधान्य’ या तत्त्वानुसार अंतिम निवड केली जाईल.