जेव्हा थेट शिक्षणमंत्री अचानक शाळेला भेट देतात... जवाहर बाल भवन शाळेत दादा भुसे रमले

एज्युवार्ता न्यूज नेटवर्क 

राज्याचे शालेय शिक्षणमंत्री दादा भुसे यांनी मंगळवारी मुंबईतील चर्नी रोड येथील जवाहर बाल भवनाला अचानक भेट देऊन विद्यार्थ्यांच्या विविध कलाविष्कारांचा आढावा घेतला. विधिमंडळाच्या पावसाळी अधिवेशनाचे कामकाज सुरू असतानाही वेळ काढून त्यांनी विद्यार्थ्यांशी संवाद साधत त्यांच्या कलागुणांचे कौतुक केले.

या भेटीदरम्यान विद्यार्थ्यांनी नाटिका, गीतगायन, शिल्पकला, रंगकला तसेच हस्तकलेच्या विविध कलाकृती सादर केल्या. सामाजिक, शैक्षणिक आणि नैतिक मूल्यांवर आधारित सादरीकरणांनी उपस्थितांची मने जिंकली. विद्यार्थ्यांच्या उत्कृष्ट कलाविष्कारांनी मंत्री भुसे प्रभावित झाले.

यावेळी बोलताना दादा भुसे म्हणाले, शिक्षण हे केवळ पाठ्यपुस्तकांपुरते मर्यादित नसून विद्यार्थ्यांच्या सर्वांगीण विकासाचे प्रभावी माध्यम आहे. कला, संस्कृती, संगीत, नाट्य, चित्रकला आणि शिल्पकला यांसारख्या विविध माध्यमांतून विद्यार्थ्यांमधील सुप्त गुणांना वाव मिळतो. अशा उपक्रमांमुळे विद्यार्थ्यांचा आत्मविश्वास वाढून त्यांच्या व्यक्तिमत्त्व विकासाला चालना मिळते.

जवाहर बाल भवन हे विद्यार्थ्यांच्या सर्जनशीलता, नेतृत्वगुण आणि विविध कौशल्यांच्या विकासासाठी महत्त्वपूर्ण केंद्र असल्याचे नमूद करत त्यांनी विद्यार्थ्यांच्या कलात्मक व बौद्धिक क्षमतांना प्रोत्साहन देण्याचे कार्य बाल भवन प्रभावीपणे करत असल्याचे सांगितले.

या प्रसंगी अंजुमन-ए-इस्लाम माध्यमिक विद्यालय, दादर तसेच गुरुनानक माध्यमिक विद्यालय, दादर येथील विद्यार्थी, शिक्षक आणि बाल भवनातील अधिकारी-कर्मचारी उपस्थित होते.