ऑनलाइन प्रक्रियेत DYD Pune नापास; महिन्याभरापासून वेबसाईट बंद,डोमेन एक्सपायर
पुणे विभागीय शिक्षण उपसंचालक कार्यालयातील अधिकाऱ्यांशी याबाबत संवाद साधला असता डोमेन रिन्यू करण्यासंदर्भातील दरपत्रक मागविण्यात आले असून निविदा प्रक्रिया पूर्ण करून डोमेन रिन्यू केले जाणार आहे, असे त्यांनी सांगितले.
eduvarta@gmail.com 
एज्युवार्ता न्यूज नेटवर्क
बालभारतीचे डोमेन विकणे आहे, अशी जाहिरात गुगलवर २०२३ मध्ये प्रसिद्ध झाली होती. त्यानंतर 11 th online admission च्या वेबसाईटचे डोमेन शिक्षण विभागाने रिन्यू न केल्याने शिक्षण विभागाला दुसरे डोमेन घ्यावे लागले. मात्र शिक्षण विभागाला पुन्हा एकदा आपले डोमेन गमवावे लागेल, अशी वेळ आली आहे. पुणे विभागीय शिक्षण उपसंचालक कार्यालयाचे dydepune.co.in हे डोमेन एक्सपायर झाले असून ते रिन्यू करायचा विभागातील अधिकाऱ्यांना विसर पडला. त्यामुळे याबाबत लवकर हालचाली केल्या नाही तर शिक्षण विभागाच्या हातून आणखी एक डोमेन जाणार आहे.
माहिती तंत्रज्ञानाच्या युगात सर्वकाही वेबसाईटवर उपलब्ध करून देण्याची पद्धत गेल्या अनेक वर्षांपासून सुरू झाली आहे. त्यामुळे वेबसाईटवर परिपत्रक प्रसिद्ध करणे, वेबसाईटवर आवश्यक बाबींची माहिती नोंदवणे, विद्यार्थी पालक व संबंधित कार्यालयाशी निगडित असणाऱ्या प्रत्येक घटकापर्यंत आवश्यक माहिती पोहोचवणे, यासाठी वेबसाईटचा उपयोग होतो.
कोणतीही वेबसाईट सुरू करण्यासाठी प्रथमतः डोमेन विकत घ्यावे लागते. पुणे विभागीय शिक्षण उपसंचालक कार्यालयाने (dyd pune) सुद्धा डोमेन विकत घेतले. या डोमेनवर विविध माहिती स्टोअर करून ठेवली. परंतु, हे डोमेन रिन्यू करायचे शिक्षण विभाग विसरले. शिक्षण विभागाकडून त्रयस्थ संस्थेला हे काम देण्यात आले असून त्याचा करार संपल्यामुळे संबंधित संस्थेने याबाबत कोणतीही कार्यवाही केली नाही. त्यामुळे सध्या पुणे विभागीय शिक्षण उपसंचालक कार्यालयाची वेबसाईट बंद आहे.
पुणे विभागीय शिक्षण उपसंचालक कार्यालयातील अधिकाऱ्यांशी याबाबत संवाद साधला असता डोमेन रिन्यू करण्यासंदर्भातील दरपत्रक मागविण्यात आले असून निविदा प्रक्रिया पूर्ण करून डोमेन रिन्यू केले जाणार आहे, असे त्यांनी सांगितले. वेबसाइट बंद पडली असेल तर सुरू केली जाईल, असे पुणे विभागीय शिक्षण उपसंचालक गणपत मोरे यांनी सांगितले.
नुकत्याच शाळा सुरू झाले असून इयत्ता अकरावीची प्रवेश प्रक्रिया सुरू झाली आहे. राज्य शासनाने अकरावी प्रवेशासाठी एकच संकेतस्थळ जाहीर केले असले तरी पुणे विभागातील विद्यार्थ्यांना आवश्यक माहिती उपलब्ध करून देण्यासाठी पुणे विभागीय उपशिक्षण संचालक कार्यालयाचे स्वतंत्र व्यासपीठ उपलब्ध असणे गरजेचे आहे. मात्र, वेबसाईट बंद असल्याने शिक्षण विभागाला कोणतीही माहिती प्रसिद्ध करता येत नाही.त्यामुळे शिक्षण विभागाचा भोंगळ कारभार पुन्हा एखादा समोर आला आहे.
