मुक्त विद्यापीठाच्या कुलगुरू पदी डॉ.संजीव सोनवणे यांची नियुक्ती

एज्युवार्ता न्यूज नेटवर्क 

सावित्रीबाई फुले पुणे विद्यापीठाचे प्र- कुलगुरू डॉ.संजीव सोनवणे यांची नाशिक येथील यशवंतराव चव्हाण महाराष्ट्र मुक्त विद्यापीठाच्या कुलगुरू पदी निवड झाली आहे. डॉ. सोनवणे यांनी शुक्रवारी (दि.१९) पुणे विद्यापीठाच्या कुलगुरू पदासाठी सुध्दा मुलाखत दिली आहे. मात्र तत्पूर्वीच सोनवणे यांची मुक्त विद्यापीठाच्या कुलगुरू पदी निवड झाली. त्यामुळे सर्वच क्षेत्रातून त्यांचे अभिनंदन केले जात आहे. सोनवणे यांच्या नियुक्तीची ऑर्डर सोशल मीडियावर व्हायरल झाली आहे.

         डॉ. संजीव सोनवणे हे सावित्रीबाई फुले पुणे विद्यापीठाच्या शिक्षणशास्त्र विभागाचे प्रमुख म्हणून कार्यरत होते. काही महिन्यांपूर्वी त्यांची पुणे विद्यापीठाच्या प्र- कुलगुरूपदी निवड करण्यात आली होती. सोनवणे यांनी विद्यापीठाच्या विविध अधिकार मंडळावर काम केले आहे. विद्यापीठाचे अधिष्ठाता, व्यवस्थापन परिषदेचे सदस्य यासह विद्यापीठातील यूजीसी अकॅडमी स्टाफ कॉलेजचे संचालक ,फॅकल्टी डेव्हलपमेंट सेंटरचे संचालक आदी महत्त्वाच्या पदावर काम केले आहे.  

 सोनवणे यांनी एम. एस्सी., एम.ए ,एम.पी. एड ,पीएच.डी. या पदव्या प्राप्त केल्या आहेत. त्यांच्या मार्गदर्शनाखाली २७ विद्यार्थ्यांनी पीएचडी पदवी प्राप्त केली आहे. सोनवणे यांनी राष्ट्रीय , आंतरराष्ट्रीय स्तरावर शोधनिबंध सादर केले असून केंद्र व राज्य शासनाच्या महत्त्वपूर्ण प्रकल्पावर काम केले आहे. तसेच शिक्षण शास्त्र विषयावरील अनेक पुस्तकांचे लेखन केले आहे. डॉ. सोनवणे हे इंडियन असोसिएशन ऑफ टीचर्स एज्युकेशन, कौन्सिल ऑफ टीचर एज्युकेशन , स्पोर्ट्स मेडिसिन असोसिएशन ऑफ इंडिया ऑल इंडिया असोसिएशन ऑफ स्पोर्ट्स स्टॅटिस्टिकचे सदस्य आहेत.                

 सावित्रीबाई फुले पुणे विद्यापीठाच्या मुक्त व दुरुस्त अध्ययन प्रशालेचे संचालक म्हणून त्यांनी महत्त्वपूर्ण योगदान दिले आहे. शिक्षणापासून वंचित राहिलेल्या विद्यार्थ्यांना नोकरी करून व गृहिणींना घर सांभाळून शिक्षण घेण्याची सुविधा या केंद्राच्या माध्यमातून उपलब्ध झाली आहे. हजारो विद्यार्थी या केंद्राच्या माध्यमातून शिक्षण घेत आहेत. या विभागाच्या पायाभरणीपासून उभारणीपर्यंत ते अभ्यास साहित्याची निर्मिती करून विद्यार्थ्यांना उपलब्ध करून देण्यापर्यंतचे काम सोनवणे यांनी चोखपणे पार पाडले आहे. आता मुक्त विद्यापीठाच्या कुलगुरू पदी निवड झाल्याने त्यांच्या कामाचा व अनुभवाचा मुक्त विद्यापीठाला निश्चितच फायदा होईल, असा विश्वास तज्ञांकडून व्यक्त केला जात आहे.