IIT मुंबई विद्यार्थी आत्महत्या प्रकरण: परीक्षा हॉलमधील शेवटच्या २० मिनिटांचे CCTV फुटेज समोर
आयआयटी मुंबईमधील विद्यार्थी साहिल वाकोडे यांच्या मृत्यूच्या प्रकरणाने देशभरात चिंता आणि चर्चांचे वातावरण निर्माण झाले आहे. पोलिसांच्या तपासात आता एक महत्त्वाचा पुरावा हाती आला आहे. १८ सप्टेंबर रोजी झालेल्या परीक्षेच्या हॉलमधील सीसीटीव्ही फुटेज मिळाले असून त्यातून साहिलच्या शेवटच्या वीस मिनिटांतील घटनाक्रम स्पष्ट होत आहे.
Eduvarta
एज्युवार्ता न्यूज नेटवर्क
आयआयटी मुंबईमधील विद्यार्थी साहिल वाकोडे यांच्या मृत्यूच्या प्रकरणाने देशभरात चिंता आणि चर्चांचे वातावरण निर्माण झाले आहे. पोलिसांच्या तपासात आता एक महत्त्वाचा पुरावा हाती आला आहे. १८ सप्टेंबर रोजी झालेल्या परीक्षेच्या हॉलमधील सीसीटीव्ही फुटेज मिळाले असून त्यातून साहिलच्या शेवटच्या वीस मिनिटांतील घटनाक्रम स्पष्ट होत आहे. या फुटेजमध्ये परीक्षा सुरू असताना साहिल सर्वात पुढच्या बेंचवर बसून पेपर लिहीत असल्याचे दिसते. त्या वेळी हॉलमध्ये सुमारे ३० ते ३५ विद्यार्थी उपस्थित होते आणि तीन प्राध्यापक पर्यवेक्षक म्हणून काम पाहत होते.
फुटेजमध्ये एक प्राध्यापक चालत येऊन साहिलच्या बेंचजवळ थांबतात. ते साहिलशी काही वेळ बोलताना दिसतात. या दरम्यान साहिल आपल्या जागेवरून उठतो आणि पुन्हा बसतो. त्याची शारीरिक भाषा थोडी तणावपूर्ण असल्याचे निदर्शनास येते. मात्र ऑडिओ नसल्यामुळे दोघांमध्ये नेमकी काय चर्चा झाली हे अद्याप स्पष्ट झालेले नाही. तपासा च्या दृष्टीने ही माहिती महत्त्वाची मानली जात आहे.
सीसीटीव्हीमध्ये साहिल आपल्या दोन्ही पायांच्या मधोमध एक वस्तू वापरताना दिसतो. ती वस्तू मोबाइल फोन होती की कॅल्क्युलेटर, हे अजून निश्चित झालेले नाही. प्राध्यापकांनी विचारणा केल्यानंतर साहिल ती वस्तू काढून प्राध्यापकाच्या हातात देतो. त्यानंतर प्राध्यापक साहिलची उत्तरपत्रिकाही घेऊन जातात. ही घटना परीक्षा संपायला अवघे वीस मिनिटे शिल्लक असताना घडली.
यानंतर साहिल स्वतःहून जागेवरून उठतो आणि संबंधित प्राध्यापकांसोबत परीक्षा कक्षातून बाहेर पडताना दिसतो. या संपूर्ण दृश्यामुळे पोलिसांना तपासात नवी दिशा मिळण्याची शक्यता आहे. कुटुंबीय आणि विद्यार्थी समुदायात या फुटेजबद्दल चर्चा सुरू झाली आहे. अधिकार्यांनी सांगितले की, ऑडिओ उपलब्ध नसल्याने पुढील चौकशी सुरू आहे.
प्रकरणाची गंभीरता लक्षात घेऊन प्रशासन आणि पोलिस विभागाने सविस्तर तपास सुरू ठेवला आहे. विद्यार्थ्यांच्या मानसिक आरोग्याबाबतही चर्चा होत आहे. या घटनाक्रमावरून परीक्षा हॉलमध्ये नेमके काय घडले याबाबत अधिक माहिती लवकरच समोर येण्याची अपेक्षा आहे. संपूर्ण प्रकरणावर समाजाने संवेदनशीलतेने लक्ष देण्याची गरज आहे.
