कायद्याच्या अंतिम वर्षाचे विद्यार्थी देखील देऊ शकतील AIBE परीक्षा : सर्वोच्च न्यायालयाचा निर्णय
कायद्याच्या अंतिम वर्षाच्या विद्यार्थ्यांचे वर्ष वाया जाणार नाही.
eduvarta@gmail.com 
एज्युवार्ता न्यूज नेटवर्क
सर्वोच्च न्यायालयाने (Supreme Court) कायद्याच्या अंतिम वर्षाच्या विद्यार्थ्यांना (final year law students) २४ नोव्हेंबर रोजी होणाऱ्या ऑल इंडिया बार परीक्षेला (AIBE) बसण्याची परवानगी दिली आहे. बार कौन्सिल ऑफ इंडियाच्या कायद्याच्या अंतिम वर्षाच्या विद्यार्थ्यांना ऑल इंडिया बार परीक्षेतील नोंदणीपासून वगळण्याच्या निर्णयाला आव्हान देणाऱ्या याचिकेवर सुनावणी करताना न्यायालयाने हा अंतरिम आदेश दिला आहे.
भारताचे सरन्यायाधीश डी. वाय. चंद्रचूड (Chief Justice of India D. Y. Chandrachud), न्यायमूर्ती जे. बी. पार्डीवाल (justice J. B. Pardiwal) आणि न्यायमूर्ती मनोज मिश्रा (Justice Manoj Mishra) यांच्या खंडपीठासमोर झालेल्या सुनावणीदरम्यान बार कौन्सिल ऑफ इंडियाने सांगितले की, "कायद्याच्या अंतिम वर्षाच्या विद्यार्थ्यांबाबत नियम तयार करण्यासाठी त्यांना वेळ हवा आहे. त्यांना नियम बनवण्यात वेळ लागू शकतो, मात्र कायद्याच्या अंतिम वर्षाच्या विद्यार्थ्यांचे एक वर्ष वाया जाणार नाही याची काळजी घ्यावी."
त्यानुसार खंडपीठाने अंतरिम निर्देश दिले. हा आदेश केवळ याचिकाकर्त्यांनाच नाही तर कायद्याच्या अंतिम वर्षाच्या सर्व विद्यार्थ्यांना लागू होईल, असे खंडपीठाने स्पष्ट केले आहे.
