सामूहिक काॅपी प्रकरण : संस्थाचालक, केंद्र संचालकावर शिक्षण विभागाची मोठी कारवाई  

एज्युवार्ता न्यूज नेटवर्क 

बारावी परीक्षेतील (12th Board Exams) जीवशास्त्र विषयाच्या पेपरला (Biology Subject Paper) माध्यमिक शिक्षणाधिकाऱ्यांच्या भरारी पथकाने (Secondary Education Officer Bharari Squad) वैजापूर तालुक्यातील निमगाव येथील कल्पतरू कनिष्ठ महाविद्यालयाला (Kalpataru Junior College Nimgaon) भेट दिली. पथकाने परीक्षा केंद्रात प्रवेश करताच विद्यार्थ्यांनी परीक्षा दालनाबाहेर कॉप्यांचा वर्षाव केल्याचा प्रकार समोर आला. परीक्षा कक्षाबाहेर कॉप्यांचा ढीग जमा झाला होता. यानंतर शिक्षण विभागाने तातडीने संस्थाचालक, केंद्र संचालकांसह १५ पर्यवेक्षकांवर गुन्हे दाखल केले आहेत. 

राज्यात सध्या बारावीच्या विद्यार्थ्यांची परीक्षा सुरू आहेत. यंदा बोर्डाच्या परीक्षा कॉपी मुक्त वातावरणामध्ये झाल्या पाहिजेत असा शासनाचा प्रयत्न आहे. कॉपी मुक्त अभिनयासाठी कठोर नियमावली देखील तयारी करण्यात आली आहे. मात्र मराठवाड्यातील  काही परीक्षा केंद्रावर या नियमांना केराची टोपली दाखवली जात असल्याचे निष्पन्न झाले आहे.  

पिंपळगाव वळण येथील सामुदायिक कॉपीचा प्रकार ताजा असतानाच पुन्हा निमगाव येथून कॉपीचा धक्कादायक प्रकार समोर आला आहे. बारावी परीक्षेत जीवशास्त्र विषयाचा पेपर होता. कल्पतरू कनिष्ठ महाविद्यालय येथील केंद्रावर माध्यमिक शिक्षणाधिकारी अश्विनी लाठकर यांच्या पथकाने अचानक भेट दिली. भेटीदरम्यान पथकाला इमारत परिसरात, दालनाबाहेर कॉपी आढळून आले. पथकाने केंद्रात प्रवेश करताच. आणि पथक आल्याची कल्पना येताच काही मिनीटातच परीक्षा दालनाबाहेर कॉप्यांचा वर्षाव केला. यामध्ये परीक्षा उपयोगी साहित्य, गाईड, स्पार्क गाईड, मायक्रो झेरॉक्ससह इतर साहित्य अशा कॉप्यांचा समावेश होता. 

परीक्षार्थी विद्यार्थ्यांची तपासणी करून परीक्षा कक्षात सोडण्याचे स्पष्ट असताना मोठ्या प्रमाणात कॉपी कशी, असाा प्रश्न उपस्थित होतो आहे. विद्यार्थी तपासणीत अक्षम्य दुर्लक्ष केल्याप्रकरणी कारवाईची प्रक्रिया शिक्षण विभागाने सुरू केली. या प्रकरणी संस्था अध्यक्ष, सचिव, केंद्र संचालक, पर्यवेक्षकांवर गुन्हा नोंदविण्यात आला आहे.