पूर्णवेळ अधिष्ठाता निवडीसाठी डिसेंबर उजाडणार

 एज्युवार्ता न्यूज नेटवर्क 

सावित्रीबाई फुले पुणे विद्यापीठाला (Savitribai Phule Pune University) पूर्णवेळ अधिष्ठाता (full-time dean )मिळण्यास आणखी काही महिने वाट पहावी लागणार आहे.राज्य शासनाकडून अधिष्ठाता पदाच्या नियुक्तीसाठी आरक्षण लागू केले जाणार आहे. त्यासंदर्भातील प्रस्तावाची फाईल अजूनही मंत्रालयात आहे.परिणामी विद्यापीठाला पूर्णवेळ अधिष्ठाता मिळण्यासाठी डिसेंबर किंवा जानेवारी महिना उजाडणार असल्याचे चित्र निर्माण झाले आहे. 

सुमारे अडीच वर्षांपासून विद्यापीठातील पूर्णवेळ अधिष्ठातांची पदे रिक्त आहेत.विद्यापीठाचे माजी कुलगुरू डॉ. नितीन करमळकर यांचा कार्यकाल संपला. त्यानंतर पूर्णवेळ अधिष्ठाता पदी नियुक्त केलेल्या पदाधिका-यांचाही कार्यकाळ संपुष्टात आला.मात्र, प्रभारी कुलगुरू डॉ. कारभारी काळे यांनी प्रभारी अधिष्ठाता यांची नियुक्ती केली.त्यानंतर सुमारे एक वर्ष प्रभारी अधिष्ठाता म्हणून काही अधिकारी यांनी काम पाहिले. त्यानंतर डॉ. सुरेश गोसावी यांची पूर्णवेळ कुलगुरू म्हणून नियुक्ती करण्यात आली.परंतु, लोकसभा निवडणूकीच्या पार्श्वभूमीवर आचारसंहिता लागू झाल्याने अधिष्ठाता नियुक्ती रखडली.परंतु, विद्यापीठाने जाहिरात प्रसिध्द करून अधिष्ठाता पदासाठी अर्ज स्वीकारल्यानंतर राज्य शासनाने मराठा आरक्षणाचा निर्णय घेतला.

प्राध्यापक पदासह अधिष्ठाता पदासाठी आरक्षण लागू करण्यात आले.त्यामुळे सध्या आरक्षण निहाय रोष्टर तपासून पूर्णवेळ अधिष्ठाता नियुक्तीची प्रक्रिया पूर्ण केली जाणार आहे. अद्याप मंत्रालयातून रोष्टर तपासून आले नाही. रोष्टर तपासून आल्यानंतर विद्यापीठातर्फे जाहिरात प्रसिद्ध केली जाईल.तसेच सुमारे एक महिना पुन्हा अर्ज स्वीकारले जातील.त्यामुळे प्राप्त अर्जाची छाणनी करून मुलाखती घेतल्या जातील.दरम्यानच्या काळात विधान सभा निवडणूकीची आचार संहिता लागू होऊ शकते.त्यामुळे पूर्णवेळ अधिष्ठाता नियुक्तीची प्रक्रिया पूर्ण होण्यास पुढील दोन ते तीन महिने जाण्याची शक्यता व्यक्त केली जात आहे.