शालेय पोषण आहारात आढळला मेलेला बेडूक; बालकांच्या जीवांशी शासनाचा खेळ

एज्युवार्ता न्यूज नेटवर्क 

पंढरपूरच्या (Pandharpur News) शाळेत एक किळसवाणा आणि संतापजनक प्रकार उघडकीस आला आहे. कासेगाव भुसेनगर येथील अंगणवाडीच्या (Kasegaon Bhusenagar Anganwadi) शाळेत पोषण आहारात मृत बेडूक (Dead frogs in school nutrition) आढळला आहे. या धक्कादायक घटनेमुळे लहानग्या जीवांशी शासनाचा खेळ सुरू असल्याचा प्रकार समोर येत आहे. या घटनेवर पालकांकडून तीव्र संताप व्यक्त केला जात आहे. शालेय पोषण आहारात (Nutrition Food) अशाप्रकारे मेलेला प्राणी सापडण्याची ही पहिलीच वेळ नाही. राज्यातील विविध जिल्ह्यांतून याआधीदेखील असे प्रकार समोर आले आहेत. त्यामुळे शालेय पोषण आहार आता विद्यार्थ्यांच्या जीवावर उठला का? असा प्रश्न सामान्य जनतेच्या मनात घिरट्या घालत आहे. 

पंढरपुर मधील कासेगाव भुसेनगर येथील अंगणवाडी शाळेतील पोषण आहारात मृत बेडूक आढळला असल्याचा धक्कादायक प्रकार समोर आला आहे. या अगोदर देखील कासेगावमध्ये शालेय पोषण आहारामध्ये मेलेला किडा आढळला होता. परंतु त्यावेळी पालकांनी दुर्लक्ष केले. आठवडाभरातच आता हा प्रकार समोर आला आहे. लहान मुलांना देण्यात येणाऱ्या शालेय पोषण आहाराचे धान्य चार महिन्यांपूर्वी शाळेत आलेले आहे, अशी माहिती शाळेने दिली आहे. त्यामुळे हे बेडकाचे पिल्लू त्याआधीच मरुन पडले असण्याची शक्यता वर्तवण्यात येता आहे. त्यामुळे खिचडीच्या किती भरवसा ठेवला जाऊ शकतो. असा सवाल उपस्थित झाला आहे.

मुलांना शाळेची गोडी लागावी यासाठी शासनाने अनेक योजना राबवल्या आहेत. विद्यार्थ्यांसाठी शासनाकडून पोषण आहार पुरवला जात आहे. मात्र शालेय पोषण आहारात सातत्याने अळ्या, किडे, झुरळ, उंदराच्या लेंड्या अशा धक्कादायक गोष्टी आढळत आहेत. शालेय पोषण आहार हा आता विद्यार्थ्यांच्या जीवावर उठला आहे की काय , अशी शंका या पोषण आहार पुरवठा करणाऱ्या ठेकेदारांच्या मानसिकतेमधून दिसत आहे. त्यामुळे या योजनेसाठी निकृष्ट दर्जाचा माल पुरवला जात असल्याचा आरोप केला जात आहे.