'या' राज्याचा मोठा निर्णय! विद्यार्थ्यांसाठी व्हॉट्सॲपवर अभ्यासाच्या नोट्स शेअर करण्यावर बंदी.. 

एज्युवार्ता न्यूज नेटवर्क 

केरळ उच्च माध्यमिक शिक्षण संचालनालयाने (Kerala Directorate of Higher Secondary Education) शिक्षणाबाबत मोठा निर्णय घेतला आहे. पुढील काळात विद्यार्थ्यांसाठी व्हॉट्सॲपवर अभ्यासाच्या नोट्स शेअर करण्यावर बंदी (Ban on sharing study notes on WhatsApp) घातली आहे. यामुळे विद्यार्थ्यांच्या जीवनात बदल होऊ शकतो, असे शिक्षण विभागाने म्हटले आहे. 

मिडिया रिपोर्टनुसार, विद्यार्थी यापुढे व्हॉट्सॲप आणि अशा इतर सोशल मीडिया प्लॅटफॉर्मवर अभ्यासाच्या नोट्स शेअर करू शकणार नाहीत. अभ्यास नेहमी वर्गात बसूनच केला पाहिजे, मोबाईल फोन किंवा इतर माध्यमातून नाही. यासाठी प्रसिद्ध करण्यात आलेल्या आदेशात स्पष्टपणे लिहिले आहे की, नोट्स सोशल मीडियावर शेअर करता येणार नाहीत आणि त्यांची प्रिंट काढता येणार नाही.

राज्यात सोशल मीडियावर ऑनलाइन अभ्यास नोट्स शेअर करण्यावर घातलेल्या बंदीबाबत उच्च माध्यमिक शाळांच्या मुख्याध्यापकांना सूचना देण्यात आल्या आहेत. शिक्षकांना सोशल मीडियाच्या माध्यमातून नोट्स शेअर करण्यापासून रोखावे. इतकेच नव्हे तर विद्यार्थ्यांना पारंपरिक पद्धतींचा वापर करण्यासही प्रोत्साहन दिले पाहिजे. प्रादेशिक उपसंचालक शाळा नियमांचे पालन केले जात आहे की नाही याची पाहणी करतील, असे या निर्देशात म्हटले आहे.

जेव्हा भारतात कोविडचा काळ आला तेव्हा देशभरात काही काळ लॉकडाऊन लागू करण्यात आला होता. या काळात शाळाही बंद ठेवण्यात आल्या होत्या. परंतु विद्यार्थ्यांना अभ्यासात फारसा त्रास होत नाही हे लक्षात घेऊन ऑनलाइन क्लासेसची संकल्पना मांडण्यात आली ज्यामुळे विद्यार्थ्यांना त्यांच्या अभ्यासात मदत झाली. मात्र आता कोविडचा प्रभाव संपल्याने केरळ सरकारने हा निर्णय घेतला आहे.