रमेश होलबोले यांना लोकशाहीर अण्णा भाऊ साठे पुरस्कार जाहीर

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या लोकशाहीर अण्णा भाऊ साठे अध्यासनाच्या वतीने साहित्यरत्न लोकशाहीर अण्णा भाऊ साठे यांच्या १०५ व्या जयंतीदिनी आंतरराष्ट्रीय युवा चित्रपट दिग्दर्शक, लेखक व कवी रमेश होलबोले (Ramesh Holbole) यांना लोकशाहीर अण्णा भाऊ साठे पुरस्कार जाहीर झाला आहे. पाच हजार रुपयांचा धनादेश, सन्मानचिन्ह, समता सप्तक, शाल, श्रीफळ असे पुरस्काराचे स्वरूप आहे. 

रमेश होलबोले यांनी एफटीआयआय या संस्थेची (Film & Television Institute of India) चित्रपट दिग्दर्शन व पटकथा लेखन विषयाची पदवी प्राप्त केली आहे. त्यांची नुकतीच जर्मनीतील फिल्म ॲकेडेमी बाडेन उटेम्बर्ग येथे कल्चरल एक्सचेंज प्रोग्रॅमअंतर्गत निवड झाली असून त्यासाठी त्यांना जर्मन सरकारची फेलोशिप प्राप्त झाली आहे. होलबोले यांनी दिग्दर्शित केलेला "आगासवाडी" हा लघुपट ५० पेक्षा अधिक देशांमध्ये पोहोचला.त्यांना आजपर्यंत जपान, अमेरिका, कॅनडा, रशिया, इटली, पोलंड, जर्मनी आणि पुणे येथील आंतरराष्ट्रीय चित्रपट महोत्सवात वीस पेक्षा अधिक पारितोषिके मिळाली आहेत.

पुरस्कार वितरण सोहळा येत्या १ ऑगस्ट,२५ रोजी सकाळी ११.३० वाजता  विद्यापीठातील संत नामदेव सभागृहात संपन्न होणार आहे. लोकशाहीर अण्णा भाऊ साठे पुरस्कार सोहळ्यास सुप्रसिद्ध आंतरराष्ट्रीय चित्रपट दिग्दर्शक मा.श्री. नागराज मंजुळे, डिक्कीचे संस्थापक पद्मश्री डॉ.मिलिंद कांबळे आणि अखिल भारतीय होलार समाज संघटनेचे संस्थापक व समाज नेते मा.ॲड.एकनाथ जावीर यांची सन्माननीय उपस्थिती राहणार आहे. विद्यापीठाचे मा.कुलगुरू डॉ.सुरेश गोसावी यांच्या अध्यक्षतेखाली होणाऱ्या या कार्यक्रमास प्र-कुलगुरु डॉ.पराग काळकर, विद्यापीठाचे प्रभारी कुलसचिव डॉ.ज्योती भाकरे व व्यवस्थापन परिषदेचे सदस्य रविंद्र शिंगणापूरकर विशेष उपस्थित रहाणार आहेत.