PHD डिग्री घेऊन रस्त्यावर विकतोय चिकन; व्हिडिओ पाहून आनंद महिंद्रांनी केलं कौतुक

एज्युवार्ता न्यूज नेटवर्क 

उच्च शिक्षण घेऊन चांगली नोकरी मिळावी म्हणून प्रत्येक तरूण धडपडत असतो. मात्र, सध्या काही तरुण-तरूणी भरमसाठ पगाराची नोकरी सोडून व्यवसायाकडे वळताना दिसत आहेत. अशाच एका उच्च शिक्षित तरूणाचा (Highly educated youth) रस्त्यावर चिकन विकतानाचा व्हिडिओ सोशल मीडियावर व्हायरल (Social media viral video) होत आहे. पी. एचडी सारखे उच्च शिक्षण घेऊन  या तरूणाने रस्त्यावर चिकन विकायचा व्यवसाय सुरू केला आहे. त्याचा हा व्हिडीओ पाहून दिग्गज उद्योगपती आनंद महिंद्रा (Anand Mahindra) यांनी त्याच्या या कामाचे कौतूक केले आहे. त्याच्याबद्दल त्यांनी एक्स वर पोस्ट शेअर केली आहे. 

व्हायरल व्हिडीओ चेन्नईचा असून पीएचडी केलेल्या या व्यावसायिक तरूणाचे नाव रायन आहे. तो १३ वर्षांपासून पार्टटाईम हाॅटेल व्यवसाय करत आहेत. हा व्यवसाय करताना त्यांच्या स्टॉलवर अमेरिकन ब्लॉगर ख्रिस्तोफर लुईस याने भेट दिली. रायनने बनवलेल्या चिकन 65, चिकन कटलेट्स आदी पदार्थ चाखून अमेरिकन ब्लॉगर प्रभावित झाला. त्यानंतर अमेरिकन ब्लॉगर चिकन विक्रेता रायन याच्याशी अधिकच संवाद वाढवण्याचा प्रयत्न करताना दिसत आहे. तेव्हा विक्रेत्याने स्वतःचे नाव गूगलवर सर्च करण्यास सांगितले. 

नाव सर्च केल्यानंतर ब्लॉगरला वाटले कदाचित फूड स्टॉलबद्दल गूगलवर सर्च करण्यास सांगितल असेल किंवा पदार्थाना रेटिंग द्यायची असेल. पण, तसं न करता तो गूगलवर स्वतःचे नाव सर्च करून त्याने लिहिलेले काही ऑनलाईन आर्टिकल्स दाखवतो. तरुणाचे हे अनोखा टॅलेंट पाहून आनंद महिंद्रासुद्धा खूश झाले आहेत. आनंद महिंद्रा यांनी विक्रेत्याबद्दल प्रशंसा करत एक पोस्ट शेअर केली आहे.  

त्यांनी लिहिले आहे की, ‘ही क्लिप गेल्या महिन्यात व्हायरल झाली होती. एका अमेरिकन ब्लॉगरला फूड स्टॉल चालवणारा पीएच.डी. विक्रेता सापडला. पण, मला खरोखरचं आश्चर्य तेव्हा वाटले जेव्हा त्याने त्याचा फोन उचलला आणि ब्लॉगरला वाटले की तो त्याला त्याच्या स्टॉलबद्दल सोशल मीडियावर दाखवणार आहे. पण त्याऐवजी, तो अभिमानाने त्याला त्याने लिहिलेले आर्टिकल्स ऑनलाइन दाखवतो.  अविश्वसनीय. अद्वितीय. भारतीय’; असे कॅप्शन आनंद महिंद्रा यांनी व्हिडीओला दिले आहे आणि त्याच्या टॅलेंटचे कौतुक केले आहे.