शाळांच्या आवारात दारूच्या बाटल्या, वाढलेले गवत, सापांचा वावर

एज्युवार्ता न्यूज नेटवर्क 

बोपोडी येथे श्री सर्वपल्ली राधाकृष्णन प्रशाला , ई लर्निंग इंग्लिश मिडीयम शाळा व उर्दू शाळा अशा एकाच ठिकाणी असलेल्या चार शाळांच्या आवारात दारूच्या बाटल्या, चकणा पाकीट, वाढलेले गवत, डास, शाळेच्या भिंतीवर १५-२० फूट झाडे, सापांचा वावर, अशी परिस्थिती निदर्शनास आल्याने आम आदमी पार्टीच्या (Aam Aadmi Party) कार्यकर्त्यांनी ठिय्या आंदोलन केले.

शाळेतील मुख्याध्यापकाला प्रश्न केला असता अनेक वेळा पत्रव्यवहार करूनही पालिका प्रशासनाकडून दाद मिळत नसल्याचे दिसले. मोठ्या प्रमाणात दारूच्या बाटल्या आवारात असल्याने, तसेच छेडछाडीच्या तक्रारी असल्याने या बाबत तातडीने शिक्षण अधिकारी , पोलीस दामिनी पथक, आरोग्य विभाग , भवन विभाग आदींना या शाळेत बोलवून घेतले व या सर्व बाबी त्यांच्या निदर्शनास आणल्या.

पुणे महापालिका प्रशासनाचे अक्षम्य दुर्लक्ष विद्यार्थ्यांच्या जीवावर बेतू शकतं, काही गंभीर घटना घडल्यास जबाबदार कोण? असा प्रश्न उपस्थित केल्यावर आज प्रशासनाने कर्मचारी पाठवून गवत काढले, जेसीबी पाठवून मैदान सपाट केले. डास फवारणी केली , सर्प मित्रास बोलवून साप पकडून नेला, दारूच्या बाटल्यांचा ३ पोती कचरा जमा केल्या गेल्या, सुरक्षा समितीचे संपर्क क्रमांक दर्शनी ठिकाणी लावण्यात आले. यापुढे अतिरिक्त सुरक्षा कर्मचारी, महिला मदतनीस नेमणूक करू व दरवाज्यावर सीसीटीव्ही , कुलूप लावू, अग्निशमन सिलेंडर रिफील करू, आवारातील बेवारस जुनी वाहने हलवू असे आश्वासन माध्यमिक शिक्षण अधिकारी श्रीमती उबाळे यांनी दिले. आपचे मुकुंद किर्दत, सुदर्शन जगदाळे, अँन अनिश, विकास चव्हाण, रितेश निकाळजे,सतीश यादव, विकास लोंढे, संजय कटारनवरे, विलास मोरे, जॉनी पेरुम्प्रल यांनी ठिय्या आंदोलनात सहभाग घेतला.