बीपीएससी उमेदवारांच्या मागण्यांसाठी आमरण उपोषण करणाऱ्या प्रशांत किशोर यांना अटक 

एज्युवार्ता न्यूज नेटवर्क 

मागील काही दिवसांपासून चर्चेचा विषय ठरलेले जन सुराज या संघटनेचे प्रमुख आणि राजकीय विशेषतज्ञ प्रशांत किशोर यांना पोलिसांनी अटक केली आहे. (Prashant Kishor has been arrested) बीपीएससी उमेदवारांच्या मागण्यांसाठी किशोर हे आमरण उपोषण करत होते (Kishor was on hunger-strike-till-death for the demands of BPSC candidates) त्यांना उपोषणाच्या ठिकाणावरून फरफटत नेले, त्यांच्या थोबाडीत मारली अशी माहिती समोर आल्यामुळे विद्यार्थ्यांमध्ये असंतोष पसरला आहे. 

किशोर यांना पोलिसांनी सोमवारी (६ जानेवारी) पहाटे ४ वाजता ताब्यात घेऊन अटक केली. पाटणा जिल्हा प्रशासनाने ही माहिती दिली. प्रशांत किशोर (पी.के.) यांना पोलिसांनी आधी ताब्यात घेतलं आणि नंतर पाटणा एम्समध्ये उपचारासाठी दाखल केलं. प्रशांत किशोर यांना पोलिसांनी जबरदस्तीने उचलून नेले, असा आरोप पीकेच्या टीमने केला, त्यानंतर एम्सच्या बाहेर आंदोलकांनी गोंधळ घातला. बिहार लोकसेवा आयोगाची (BPSC) 70वी प्राथमिक परीक्षा रद्द करण्याच्या मागणीसाठी प्रशांत किशोर पाटणा येथील गांधी मैदानावर आमरण उपोषण करत होते. बिहारमध्ये युवा सत्याग्रह समिती या नव्या संघटनेची स्थापना करण्यात आल्याचे त्यांनी रविवारी सांगितले होते. 

गेल्या वर्षी 13 डिसेंबर रोजी झालेल्या संयुक्त स्पर्धा परीक्षेत पाटणा येथील बापू भवन परीक्षा केंद्रावर प्रश्नपत्रिका फुटल्याची अफवा पसरली होती, त्यानंतर शेकडो उमेदवारांनी आपला निषेध नोंदवण्यासाठी परीक्षेवर बहिष्कार टाकला होता. यानंतर बीपीएससीने बापू परीक्षा संकुलात पुन्हा परीक्षा घेण्याचे आदेश दिले. यासंदर्भात पाटणातील अनेक केंद्रांवर फेरपरीक्षेचे आयोजनही करण्यात आले होते. दुसरीकडे, मोठ्या संख्येने परीक्षार्थी संपूर्ण परीक्षा रद्द करण्याची मागणी करत आहेत.

या प्रकरणावरून पीके हे सलग चार दिवस आमरण उपोषणावर होते. पीके 2 जानेवारी रोजी सायंकाळी 5 वाजल्यापासून पाटणा येथील गांधी मैदानात आमरण उपोषणाला बसले होते. त्यांच्या नियमित तपासणी दरम्यान, डॉक्टरांनी त्यांना इशारा दिला की जर त्याच्यावर उपचार झाले नाहीत तर त्याची प्रकृती आणखी बिघडू शकते. आमरण उपोषण केल्याने त्यांच्यावर उपचार होत नव्हते.

दरम्यान, पीके यांना अटक झाल्यानंतर थोड्या वेळापूर्वी त्यांना जामीन मंजूर झाल्याची माहिती समोर आली आहे. पण पीके यांनी जामीन नाकारला आहे. त्यामुळे आता त्यांची रवानगी तुरुंगात होऊ शकते.