‘भारतीय छात्र संसद’ चे माजी उपराष्ट्रपती वैंकय्या नायडू यांच्या हस्ते उद्घाटन

एज्युवार्ता न्यूज नेटवर्क 

भारतीय छात्र संसद फाऊंडेशन, एमआयटी स्कूल ऑफ गव्हर्नमेंट आणि एमआयटी वर्ल्ड पीस युनिव्हर्सिटी, पुणे यांच्या संयुक्त विद्यमाने तीन दिवसीय १३ व्या भारतीय छात्र संसदेचे आयोजन येत्या १० ते १२ जानेवारी या कालावधीत पुण्यात करण्यात आले आहे. स्वामी विवेकानंद सभामंडप, एमआयटी वर्ल्ड पीस युनिव्हर्सिटी  कोथरूड  येथे छात्र संसद होणार आहे. सन २०११ पासून दरवर्षी या छात्र संसदेचे आयोजन केले जाते.

महाराष्ट्र राज्याचे उच्च व तंत्रशिक्षण मंत्रालय, तसेच  क्रीडा व युवक कल्याण मंत्रालय आणि मानवाधिकार, लोकशाही, शांतता आणि सहिष्णुतासाठीचे युनेस्को अध्यासन यांच्या सहकार्याने ही छात्र संसद होत आहे. नॅशनल टीचर्स काँग्रेस फाउंडेशन, नॅशनल विमेन्स पार्लमेंट, सरपंच संसद यांच्या सहकार्याने ही संसद भरविण्यात येणार असून अनेक राष्ट्रीय संस्थांनीही या संसदेला पाठिंबा दिला आहे.

१३ व्या भारतीय छात्र संसदेचा उद्घाटन समारंभ बुधवारी  सकाळी ११.०० वाजता माजी उपराष्ट्रपती वैंकय्या नायडू यांच्या शुभहस्ते होणार आहे. जगप्रसिद्ध व्यावसायिक सल्लागार व लेखक प्रा.रामचरण हे प्रमुख पाहुणे म्हणून उपस्थित राहणार आहेत. येत्या शुक्रवारी १२ जानेवारी २०२४ रोजी दुपारी ३.०० वाजता या संसदेचा समारोप होणार आहे. प्रेरणादायी व्याखाते डॉ. स्वामी ज्ञानवत्सल, मध्य प्रदेशचे माजी मुख्यमंत्री शिवराजसिंग चौहान आणि माजी प्रशासकीय अधिकारी व लोकसत्ता आंदोलनाचे अध्यक्ष जयप्रकाश नारायण उपस्थित राहणार आहेत.