संसदेत पेटला 'थ्री लैंग्वेज फॉर्मूला'चा मुद्दा; शिक्षणाच्या भगविकरणाचा आरोप
लोकसभेत प्रश्नोत्तराच्या तासादरम्यान, द्रमुक खासदार टी. सुमती म्हणाल्या की, " तमिळनाडू सरकार एनईपी स्वीकारत नसल्याने, पीएम श्री योजनेअंतर्गत तामिळनाडूला वाटप करण्यात येणारा २००० कोटी रुपयांचा केंद्रीय निधी इतर राज्यांना देण्यात आला आहे." प्रत्युत्तरात, शिक्षण मंत्री प्रधान यांनी द्रमुकवर तामिळनाडूमधील विद्यार्थ्यांवर अन्याय केल्याचा आरोप केला.
eduvarta@gmail.com 
एज्युवार्ता न्यूज नेटवर्क
मागील दोन दिवसांपासून संसदेत (parliament) राष्ट्रीय शिक्षण धोरणातील (national education policy) NEP त्रिभाषिक सूत्राचा (Three Language Formula) मुद्दा चांगलाच गाजत आहे. तामिळनाडू सरकार याला सतत विरोध करत आहे. (Tamil Nadu government continues to oppose) केंद्रीय शिक्षणमंत्र्यांच्या वादग्रस्त विधानानंतर, द्रमुकसह इतर विरोधकांनी देखील केंद्राचा तीव्र निषेध केला आहे.
दरम्यान आज काँग्रेस खासदार के सुरेश यांनी राष्ट्रीय शिक्षण धोरण (एनईपी) वरून केंद्र सरकारवर टीका करत आरोप केला की, सरकारचा खरा हेतू "संपूर्ण शिक्षण व्यवस्थेचे भगवेकरण" करण्याचा आहे. तर भाजपचा आरोप आहे की द्रमुक या मुद्द्यावर राजकारण करत आहे.
लोकसभेत प्रश्नोत्तराच्या तासादरम्यान, द्रमुक खासदार टी. सुमती म्हणाल्या की, " तमिळनाडू सरकार एनईपी स्वीकारत नसल्याने, पीएम श्री योजनेअंतर्गत तामिळनाडूला वाटप करण्यात येणारा २ हजार कोटी रुपयांचा केंद्रीय निधी इतर राज्यांना देण्यात आला आहे." प्रत्युत्तरात, शिक्षण मंत्री प्रधान यांनी द्रमुकवर तामिळनाडूमधील विद्यार्थ्यांवर अन्याय केल्याचा आरोप केला.
शिक्षण मंत्री धर्मेंद्र प्रधान म्हणाले की, "एक काळ असा होता जेव्हा तामिळनाडू सरकार केंद्र सरकारसोबत (एनईपीवर) सामंजस्य करार करण्यास तयार होते. तामिळनाडूच्या शिक्षणमंत्र्यांसह काही सदस्य आमच्याकडे आले आणि त्यांनी या धोरणाला होकार दिला होता." आम्ही तामिळनाडूला आर्थिक वाटप करत आहोत, पण द्रमुक त्यांचा शब्द पाळत नाहीये. ते तामिळनाडूच्या विद्यार्थ्यांचे भविष्य उद्ध्वस्त करत आहेत. ते जाणूनबुजून राजकारण करत आहेत. हे दुर्दैवी आहे.
द्रमुक खासदार कनिमोझी म्हणाल्या की, त्रिभाषा सूत्र धोरण तामिळनाडूला मान्य नाही आणि तामिळनाडू सरकारनेही ते कधीही स्वीकारलेले नाही. लोकसभेतील चर्चेत तामिळनाडूचे मुख्यमंत्री एमके स्टॅलिन धर्मेंद्र प्रधान यांच्यावर निशाणा साधत म्हणाले, "ते स्वतःला राजा समजून 'अहंकाराने' बोलतात. त्यांनी स्वतःच्या जिभेवर नियंत्रण ठेवावे " भाजप खासदार निशिकांत दुबे यांनी आरोप केला की, "द्रमुक निवडणुका जिंकण्यासाठी भावना भडकावत आहे."
