शिक्षक व पदवीधर मतदारसंघ निवडणुकीच्या पार्श्वभूमीवर पोलिसांना विशेष अधिकार
विधानपरिषद शिक्षक व पदवीधर मतदारसंघ निवडणूक २०२६ चा कार्यक्रम जाहीर झाला असून, २३ ऑक्टोबर २०२६ रोजी मतदान आणि २७ ऑक्टोबर २०२६ रोजी मतमोजणी होणार आहे. निवडणूक प्रक्रियेच्या कालावधीत आदर्श आचारसंहिता लागू राहणार आहे.
Eduvarta
एज्युवार्ता न्यूज नेटवर्क
विधानपरिषद शिक्षक व पदवीधर मतदारसंघ निवडणूक २०२६ शांततेत, निर्भय आणि पारदर्शक वातावरणात पार पाडण्यासाठी पिंपरी-चिंचवड पोलिस आयुक्तालयाच्या कार्यक्षेत्रातील निवडणूक होणाऱ्या भागात महाराष्ट्र पोलीस अधिनियम, १९५१ मधील कलम ३६ अन्वये पोलिसांना विशेष अधिकार प्रदान करण्यात आले आहेत.
पिंपरी-चिंचवडचे पोलीस सहआयुक्त डॉ. शशिकांत महावरकर यांनी याबाबतचा आदेश जारी केला आहे. भारत निवडणूक आयोगाच्या निर्देशानुसार विधानपरिषद शिक्षक व पदवीधर मतदारसंघ निवडणूक २०२६ चा कार्यक्रम जाहीर झाला असून, २३ ऑक्टोबर २०२६ रोजी मतदान आणि २७ ऑक्टोबर २०२६ रोजी मतमोजणी होणार आहे. निवडणूक प्रक्रियेच्या कालावधीत आदर्श आचारसंहिता लागू राहणार आहे.
निवडणूक प्रक्रिया सुरळीत व कायदा-सुव्यवस्था अबाधित राखण्यासाठी निवडणूक होणाऱ्या कार्यक्षेत्रातील सर्व पोलिस ठाण्यांच्या प्रभारी अधिकाऱ्यांना लेखी अगर तोंडी आदेश देण्याचे अधिकार प्रदान करण्यात आले आहेत.
या अधिकारांतर्गत रस्त्यावरून जाणाऱ्या जमावाचे अगर मिरवणुकीतील व्यक्तीचे वर्तन किंवा कृत्याबाबत आदेश देणे, मिरवणूक अथवा जमाव कोणत्या मार्गाने जाईल किंवा कोणत्या मार्गाने जाणार नाही, याबाबत मार्ग निश्चित करणे, सार्वजनिक ठिकाणी कार्यक्रमाच्या वेळी वापरण्यात येणाऱ्या ध्वनिक्षेपकाच्या ध्वनीची तीव्रता निश्चित करून त्यावर नियंत्रण ठेवणे तसेच मिरवणुकीच्या प्रचारासाठी जाहीर सभा घेण्याचे ठिकाण, दिनांक व वेळ याबाबत नियंत्रण ठेवणे, या बाबींचा समावेश आहे.
हा आदेश पिंपरी-चिंचवड पोलिस आयुक्तालयाच्या कार्यक्षेत्रातील निवडणूक होणाऱ्या भागात २५ सप्टेंबर पासून ३१ ऑक्टोबर २०२६ रोजी रात्री १२ वाजेपर्यंत लागू राहणार आहे. आदेशाचे उल्लंघन करणाऱ्या व्यक्तींवर महाराष्ट्र पोलीस अधिनियमातील संबंधित तरतुदीनुसार शिक्षेस पात्र कारवाई करण्यात येणार आहे.
