एलएलबी ३ वर्षे प्रवेशासाठी यंदा मोठी चुरस, जवळपास ८३ हजार अर्ज दाखल

एज्युवार्ता न्यूज नेटवर्क

राज्य सामाईक प्रवेश परीक्षा (State Common Entrance Examination) कक्षामार्फत राबवण्यात येणाऱ्या एलएलबी तीन वर्षे (LLB 3 years)या अभ्यासक्रमाची (LLB 3 courses) प्रवेश परीक्षा देणाऱ्यांमध्ये यंदा मोठी चुरस पाहायला मिळणार आहे. या अभ्यासक्रमासाठी ८२ हजार ८८३ विद्यार्थ्यांची नोंदणी (Registration of 82 thousand 883 students) झाली आहे. गेल्या वर्षीच्या तुलनेत ही नोंदणी ११ हजार ६२३ ने कमी आहे. मात्र, तरीही जागांच्या तुलनेत सामायिक प्रवेश परीक्षा (सीईटी) देणाऱ्यांची संख्या मोठी असून, यंदाही प्रवेशासाठी चुरस रंगणार असल्याची चिन्हे आहेत. या अभ्यासक्रमाची परीक्षा १ आणि २ एप्रिलला घेतली जाणार आहे. 

विविध क्षेत्रातील व्यावसायिक, नोकरदार पुढील शिक्षण घेण्याच्या उद्देशाने विधि अभ्यासक्रमांना प्रवेश घेत आहेत. विधिच्या पदवीमुळे नोकरीत मिळू शकणारी बढती, तसेच वकिली व्यवसायाला असलेली प्रतिष्ठा यामुळे या अभ्यासक्रमाला प्रवेश घेण्यासाठी प्रयत्न करत आहेत. गेल्या वर्षी अनेकांना या अभ्यासक्रमासाठी असलेले उपलब्ध जागा लक्षात घेता प्रवेश मिळाले नाहीत. यंदाही या अभ्यासक्रमाची सीईटी देणाऱ्यांची संख्या ८३ हजारांवर गेली आहे. परिणामी प्रवेशासाठी स्पर्धा राहणार असल्याची चिन्हे आहेत.

सीईटी सेलने ८ जानेवारीपासून एलएलबीच्या प्रवेश परीक्षेसाठी अर्ज नोंदणीस सुरुवात केली होती. त्यानंतर आता प्रवेश अर्जाची मुदत संपल्यानंतर पुढील टप्पा हा परीक्षेचा असणार आहे.  त्यानुसार यंदा एलएलबी तीन वर्षे अभ्यासक्रमाची सीईटी परीक्षा १ आणि २ एप्रिलला घेतली जाणार आहे. 

गेल्या वर्षी तीन वर्षे एलएलबी अभ्यासक्रमासाठी २१७ कॉलेजांमध्ये २३ हजार ७२९ जागा उपलब्ध होत्या. त्यासाठी ९४ हजार ५०६ विद्यार्थ्यांनी सीईटी परीक्षा दिली होती. तर प्रवेशासाठी यातील ५३ हजार ९९० विद्यार्थ्यांनी अर्ज सादर केले होते. प्रत्यक्षात यामधील २२ हजार ९१७विद्यार्थ्यांचे प्रवेश झाले होते.