मान्यता रद्द झालेल्या सिंहगड डेंटल कॉलेजच्या प्राध्यापकाची गळफास घेऊन आत्महत्या 

एज्युवार्ता न्यूज नेटवर्क 

पुणे शहर हे शिक्षणाचे माहेरघर म्हणून ओळखले जाते. तर याच विद्येच्या माहेरघरात एक धक्कादायक घटना घडली आहे. पुण्यातील नामांकित कॉलेजच्या प्राध्यापकानं टोकाचे पाऊल उचलले आहे. शहरातील सिंहगड डेंटल कॉलेजच्या (Sinhgad Dental Collage) प्राध्यापकांनी आपल्या राहत्या घरी आत्महत्या (Professor's suicide) केल्याची धक्कादायक माहिती समोर आली आहे. या धक्कादायक घटनेमुळे संपूर्ण शिक्षण क्षेत्रात खळबळ उडाली आहे. काही दिवसांपुर्वीच सिंहगड डेंटल कॉलेजची मान्यता रद्द (Dental college recognition cancelled) करण्यात आली होती. त्यामुळे या आत्महत्येबाबत वेगवेगळे तर्क-वितर्क लागले जात आहेत. राजू पाटील (Professor Raju Patil) असे आत्महत्या केलेल्या प्राध्यापकांचं नाव आहे. 

मिळालेल्या प्राथमिक माहितीनुसार, प्राध्यापक राजू पाटील हे सिंहगड डेंटल कॉलेजमध्ये विभागप्रमुख (HOD) म्हणून काम करत होते. मात्र, त्यांनी आत्महत्या करत आपले जीवन संपवल्यामुळे सर्वांनाच धक्का बसला आहे. राजू पाटील यांनी शनिवारी आपल्या राहत्या घरी आत्महत्या केली. शनिवारी दुपारी 12 वाजण्याच्या सुमारास जेव्हा राजू पाटील यांच्या पत्नी घरी आल्या तेव्हा त्यांच्या हा सगळा प्रकार निदर्शनास आला. त्यांनी याबाबतची माहिती पोलिसांना कळवली. या घटनेची माहिती मिळताच पोलीस तातडीने घटनास्थळी दाखल झाले. पोलिसांनी पाटील यांचा मृतदेह शवविच्छेदनासाठी पाठवला. 

सिंहगड डेंटल कॉलेजची मान्यता मागील काही दिवसांपूर्वी रद्द करण्यात आली होती. विद्यापीठाने ठरवून दिलेल्या शैक्षणिक दर्जानुसार कॉलेजचे कामकाज नसल्याचे विद्यापीठाच्या निदर्शनास आले होते. त्यामुळे या कॉलेजमधील पदवी आणि पदव्युत्तर अभ्यासक्रम असंलग्नित करण्यात आला होता. तसेच विद्यापीठ अधिनियममधील तरतुदींचा भंग केल्याचा ठपकाही महाविद्यालयावर ठेवण्यात आला आहे.

विद्यापीठाकडून शैक्षणिक नुकसानीकडे दुर्लक्ष केल्यामुळे सिंहगड डेंटल कॉलेजवर मोठी कारवाई केली आहे. महाराष्ट्र आरोग्य विज्ञान विद्यापीठाने नियंमाचे उल्लंघन केल्याप्रकरणी सिंहगड डेंटल कॉलेज आणि रूग्णालयाची संलग्नता रद्द केली आहे. यादरम्यान, कॉलेजचे प्राध्यापक राजू पाटील यांनी आत्महत्या केल्यामुळे या प्रकरणी वेगवेगळे तर्क-वितर्क लावले जात आहेत.