यंदा शिक्षक उन्हाळी सुट्टीला मुकाणार, डिजिटल जनगणनेचं काम लावलं जाणार

एज्युवार्ता न्यूज नेटवर्क 

शिक्षकांना यंदा उन्हाळी सुट्टीमध्ये जनगणनेच्या कामाला जुंपले जाणार आहे. त्यामुळे यंदाच्या उन्हाळ्याच्या सुट्टीमध्ये (Summer Vacation) शिक्षकांना जास्तीचे काम लागणार आहे. यंदा डिजिटल जनगणना (Digital Census) होणार आहे. यासाठी शिक्षकांचे प्रशिक्षण देण्यात येणार आहे. त्यामुळे जनगणनेसाठी नियुक्त (Appointed for the Census) केलेल्या शिक्षकांना १६ मे ते १५ जून या कालावधीमध्ये प्रशिक्षणासाठी मुख्यालयात हजर राहण्याचे आदेश शिक्षण अधिकाऱ्यांनी (Orders from the Education Officer) काढले आहेत. 

चालू शैक्षणिक वर्षे संपण्यास अवघा काही दिवसांचा कालावधी शिल्लक राहिला आहे. यंदा ३० एप्रिलला शैक्षणिक सत्र संपणार आहे. शाळांना २ मे पासून सुट्टया लागणार आहेत. २६ जून पासून नवीन शैक्षणिक सत्र सुरु होणार आहे. पण या उन्हाळ्यात शिक्षकांना सुट्टीचा लाभ मिळणार नाही. गेल्या दोन वर्षांत लोकसभा, विधानसभा, नगरपरिषदा, जिल्हा परिषदांच्या निवडणूक कामकाजात गुरफटलेल्या शिक्षकांना आपली सरकारी कामातून सुटका झाल्याचे वाटले होते.

मात्र, पुन्हा एकदा येऊ घातलेल्या जनगणनेच्या कामकाजाकडे त्यांना डोळ्यात तेल घालून काम करण्यासाठी सज्ज राहावे लागणार आहे. त्यामुळे आता या शिक्षकांच्या सुट्टया रद्द केल्या आहेत. १ मेनंतर शाळांना उन्हाळी सुट्टी असली तरी शिक्षकांना मात्र जनगणनेच्या कामासाठी प्रशिक्षणाचे धडे गिरवल्यानंतर १६ मे पासून ते १५ जूनपर्यंत जनगणनेच्या कामकाजासाठी मुख्यालय सोडता येणार नाही. 

उन्हाळ्याच्या सुट्टीतील पर्यटन, देवदर्शन, लग्नकार्य आदी कार्यक्रमावर गदा येणार असल्याने शिक्षकांकडून तीव्र नाराजी व्यक्त केली जात आहे. राष्ट्रीय जनगणनेच्या कामासाठी जिल्ह्यातील शिक्षकांच्या नेमणुका केल्या आहेत. या कामासाठी शिक्षकांना १६ मे ते १५ जून या कालावधीमध्ये त्यांच्या जिल्ह्याच्या मुख्यालयात उपस्थित राहावे लागणार आहे. आणि ऑनलाइन जनगणनेचे काम करावे लागणार आहे.